Прэзыдэнт Украіны Ўладзімір Зяленскі, архіўнае фота
Аднак для Ўкраіны гэта немагчыма, сказаў украінскі прэзыдэнт Уладзімір Зяленскі, якога цытуе Reuters.
Расейскую прапанову правесьці перамовы з Украінай у Беларусі Ўладзімір Зяленскі ацаніў як несур’ёзную ініцыятыву:
«Беларусь для нас сёньня — гэта краіна, з якой ляцелі ракеты, і адпаведна яна саюзьнік краіны, якая на нас напала. І войскі прыйшлі зь Беларусі. Гэта проста немагчыма наконт Беларусі», — сказаў Зяленскі, якога цытуе interfax.com.ua.
Уладзімір Зяленскі зноў выказаў гатоўнасьць асабіста сустрэцца з Уладзімірам Пуціным, калі рашэньне аб спыненьні агню можна абмеркаваць неадкладна без папярэдніх тэхнічных сустрэчаў.
«Калі Пуціну не падабаецца двухбаковая сустрэча, ці ўсе хочуць, каб гэта была трохбаковая сустрэча, — мне ўсё роўна. Я гатовы да любога фармату», — сказаў Зяленскі ў размове з журналістамі 27 траўня.
Паводле ягоных словаў, Украіна абмяркоўвае некалькі пляцовак для магчымых перамоваў аб спыненьні вайны, найбольш рэальныя зь якіх — Турэччына, Ватыкан і Швайцарыя. Ён адзначыў, што сустрэчу ў Ватыкане падтрымліваюць усе, акрамя расейскага боку.
Пазыцыю Ўладзімера Зяленскага падтрымала Сьвятлана Ціханоўская.
«Лукашэнка не нэўтральны гулец — ён саагрэсар у пуцінскай вайне», напісала яна.
І падкрэсьліла, што беларусы наадварот падтрымліваюць Украіну.
Перамовы Ўкраіны і Расеі ў Стамбуле 15 і 16 траўня не прывялі да спыненьня баёў. Больш за тое, у мінулыя выходныя Расея ўчыніла адзін з найбуйнейшых нападаў бесьпілётнікаў на Ўкраіну, паводле зьвестак украінскага боку.
Расейскія прадстаўнікі ў Стамбуле выставілі максымалісцкія патрабаваньні да Ўкраіны, у тым ліку запатрабавалі вывесьці ўкраінскія войскі з часткова акупаваных Расеяй рэгіёнаў. Гэтыя ўмовы адхіляюць Украіна і многія яе заходнія саюзьнікі.
Тым часам урад Нямеччыны пацьвердзіў, што прэзыдэнт Украіны Ўладзімір Зяленскі наведае Бэрлін у сераду 28 траўня для перамоваў з канцлерам Фрыдрыхам Мэрцам.
Паводле прэс-сакратара ўраду Штэфана Карнэліюса, візыт будзе прысьвечаны падтрымцы Нямеччынай Украіны і намаганьням дасягнуць спыненьня агню.
Карнэліюс кажа, што Зяленскага прымуць з вайсковымі ўшанаваньнямі ў канцылярыі Мэрца. Палітыкі правядуць перамовы, пасьля чаго адбудзецца рабочы абед і сумесная прэс-канфэрэнцыя.
Зяленскі таксама сустрэнецца з прадстаўнікамі нямецкага бізнэсу, а затым адправіцца ў палац Бэльвю на сустрэчу з прэзыдэнтам Германіі Франкам-Вальтэрам Штайнмаерам.
Гэта першы візыт Зяленскага ў Бэрлін з таго часу, як Мэрц стаў канцлерам.
Форум