Зьявіліся чарговыя відэадоказы ваенных злачынстваў расейцаў ва ўкраінскай Бучы

Радыё Свабодная Эўропа / Радыё Свабода

09 красавік 2025, 17:05

Цела забітага расейскімі вайскоўцамі мірнага жыхара і спаленая машына на вуліцы Бучы. 2 красавіка 2022 году

На кадрах ясна бачна, як расейскія вайскоўцы адкрываюць агонь па цывільных аўтамабілях у горадзе, куды прыйшлі з акупацыяй.

Украінская служба Радыё Свабодная Эўропа/Радыё Свабода апублікавала запісы з камэр назіраньня і бесьпілётніка ў Бучы, а таксама расповяз цывільнага жыхара, які атрымаў сур’ёзнае раненьне ў галаву, калі расейскія вайскоўцы адкрылі агонь па машыне, у якой ён быў.

Расьсьледаваньне ўкраінскай службы Радыё Свабода, падмацаванае неапублікаванымі запісамі зь відэарэгістратара і дрону, пралівае новае сьвятло на тое, як адбываліся масавыя забойствы мірных жыхароў Бучы ў час расейскай акупацыі.

На запісах зь бесьпілётніка відаць, як расейскія вайскоўцы выстаўляюць на вуліцы Заводзкай у Бучы бранятэхніку з сымбалем «V» (Расея выкарыстоўвала яго ў пачатку ўварваньня) і адкрываюць агонь без папярэджаньня — па выразна пазначаным (чырвоныя крыжы, белыя самаробныя сьцягі) цывільным аўтамабілям.

Аўтамабіль з надпісам «Дзеці», расстраляны расейскімі вайскоўцамі ў час шырокамаштабнага ўварваньня Расеі ва Ўкраіну. Кіеўская вобласьць, 2022 год

Ахвярай адной з такіх засадаў стаў Мікалай Брэднеў, які спрабаваў пакінуць горад.

«Калі мы выяжджалі, мы паставілі на лабавым шкле чырвоны крыж, парвалі палатно і перад ад’ездам прывязалі да машыны белыя анучы, — падкрэсьлівае ён. — Гэта значыць, было выразна пазначана, што ў машыне мірныя жыхары».

«Я бачыў, як яны (расейцы) выбеглі з кулямётамі і адразу, без папярэджаньня, пачалі страляць з трох кулямётаў па машыне», — кажа Мікалай.

Брэднеў атрымаў цяжкое агнястрэльнае раненьне ў галаву: куля разьнесла частку чэрапа, ён перажыў трэпанацыю. Агулам, паводле ягоных словаў, у машыну, у якой ён ехаў, выпусьцілі каля 20 куляў: 18 сьледчыя пазьней выявілі ў машыне, адна трапіла Брэдневу проста ў галаву.

«Я тады ня страціў прытомнасьці, я проста страціў зрок, нічога ня бачыў», — кажа Мікалай.

Паводле яго, кулі забілі некалькіх чалавек у машыне, яшчэ аднаму чалавеку, які ехаў зь ім, куля адарвала кончык носу, а сам Брэднеў страціў шмат крыві.

Зьнішчаныя расейцамі цывільныя аўтамабілі пад Кіевам, 19 красавіка 2022 году

Дактары ўсталявалі Мікалаю на левы бок чэрапа тытанавую пласьціну плошчай 56 квадратных сантымэтраў. Празь некалькі месяцаў пасьля траўмы і апэрацыі ў Бреднева пачаліся прыступы эпілепсіі, што значна пагоршыла якасьць ягонага жыцьця.

Празь некалькі гадзін пасьля абстрэлу відэа з украінскага бесьпілётніка пацьвердзіла прысутнасьць расейскай бранятэхнікі на месцы расстрэлу машыны. Бронеаўтамабіль быў маркаваны сымбалем «V»: ён, як «Z» і «O», выкарыстоўваўся расейскімі войскамі для абазначэньня сваёй тэхнікі ў першыя месяцы вайны.

Украінскія сьледчыя лічаць, што ў страляніне ўдзельнічалі вайскоўцы 234-га дэсантна-штурмавога палка, вядомага як «пскоўскія дэсантнікі». Полк быў выведзены з Кіеўскай вобласьці вясной 2022 году і пасьля панёс вялікія страты ў баях у Данецкай вобласьці. На запісах камэраў відэаназіраньня, зробленых у Бучы непадалёк ад месца расстрэлу, відаць, як салдаты гэтага падразьдзелу за дзень да забойства рабуюць дамы і псуюць маёмасьць. Адзін зь іх страляе з аўтамата па камэры назіраньня.

Украінскія сьледчыя лічаць, што менавіта гэты расейскі полк кантраляваў навакольле ў Бучы ў час расстрэлаў мірных жыхароў і катаваньняў. Расея адмаўляе гэтыя ваенныя злачынствы.

Акупацыя Бучы і расьсьледаваньні злачынстваў расейцаў

Расейскія акупанты захапілі Бучу ў самым пачатку поўнамаштабнага ўварваньня ва Ўкраіну. Горад месяц быў пад акупацыяй.

31 сакавіка 2022 году расейскія часткі былі вымушаныя адступіць і пакінулі Бучу, а ўкраінскія войскі ўвайшлі ў горад. Яны бачылі на вуліцах целы забітых і закатаваных мясцовых жыхароў (у многіх былі зьвязаныя за сьпінай рукі), а таксама масавыя магілы загінулых мірных жыхароў, дзе часткі целаў былі зьнявечаныя.

Агулам, паводле ўкраінскіх сьледчых, за месяц расейскай акупацыі ў Бучы загінулі 554 мірныя жыхары. Чатыры дзясяткі лічацца зьніклымі бязь вестак, яшчэ 33 жыхары Бучы дагэтуль знаходзяцца ў расейскім палоне. У той жа час расейскі бок працягвае адмаўляць масавыя забойствы і ваенныя злачынствы ў Бучы, называючы тое, што ўбачылі журналісты ўсіх сусьветных СМІ, «фальшыўкай» і «інсцэніроўкай».

У выніку 33-дзённай акупацыі Бучы з 27 лютага па 31 сакавіка 2022 году загінуў 561 мірны жыхар, у тым ліку 12 дзяцей. Таксама, паводле ўкраінскіх уладаў, у Бучы апазнаныя больш за 2,5 тысячы расейскіх вайскоўцаў, якія былі ў горадзе. Зь іх 100 падазраюцца ў ваенных злачынствах, а 34 афіцыйна заяўлена аб падазрэньнях. Нацыянальная паліцыя Ўкраіны паведаміла, што раскрыла 72 забойствы, учыненыя расейскімі вайскоўцамі ў час акупацыі Бучы, а 24 абвінаваўчыя акты ўжо перададзеныя ў суд.

Сьледчыя неаднаразова тлумачылі, што многія целы ахвяраў у брацкіх магілах былі спаленыя, што ўскладняла ідэнтыфікацыю.

«Працэс ідэнтыфікацыі працягваецца. Год таму ў нас было 60 неапазнаных целаў. Цяпер іх 13. Працэс крыху ўскладняецца тым, у якім стане мы знайшлі гэтыя целы — іх проста спалілі расейцы. Але гэты працэс працягваецца, праводзяцца адпаведныя судова-мэдыцынскія экспэртызы», — кажа кіраўнік Дэпартамэнту расьсьледаваньня ваенных злачынстваў Нацыянальнай паліцыі Ўкраіны Дзьмітро Шаўчук.