Па словах Трампа, на гэтым ці наступным тыдні ён можа сустрэцца з прэзыдэнтам Украіны Ўладзімірам Зяленскім у Белым доме для падпісаньня пагадненьня аб карысных выкапнях. Ён зазначыў, што ЗША і Ўкраіна «вельмі блізкія да заключэньня канчатковага пагадненьня».
Па словах Трампа, ён ня ведае, калі сустрэнецца з прэзыдэнтам Расеі Ўладзімірам Пуціным, але рана ці позна гэта адбудзецца. Трамп сказаў, што гатовы ў зручны час наведаць Маскву, але 9 траўня можа быць занадта рана.
На пытаньне аб тым, ці варта Ўкраіне саступіць свае тэрыторыі Расеі падчас перамоваў аб спыненьні вайны, Трамп адказаў: «Паглядзім». Ён дадаў, што перамовы толькі пачынаюцца.
Падчас прэсавай канфэрэнцыі Трампа спыталі, ці назваў бы ён Пуціна дыктатарам (на мінулым тыдні ён назваў дыктатарам Зяленскага):
«Я не выкарыстоўваю гэтыя словы легкадумна. Паглядзім, як усё пройдзе. У нас ёсьць шанец на сапраўды добрую дамову паміж некалькімі краінамі», — адказаў прэзыдэнт ЗША.
Макрон у сваю чаргу чарговы раз паведаміў аб гатоўнасьці адправіць на тэрыторыю Ўкраіны францускія войскі ў якасьці міратворцаў. Трамп у адказ падкрэсьліў, што прэзыдэнт Расеі Ўладзімір Пуцін прыме ідэю адпраўкі міратворцаў з Эўропы.
Пакідаючы Белы дом, Макрон заявіў, што Трамп прыняў яго «вельмі добра, вельмі прыязна». Прэзыдэнты таксама правялі відэаканфэрэнцыю з прадстаўнікамі G7.
Перад адлётам у Вашынгтон Макрон заявіў, што неабходныя меры для «стрымліваньня» Расеі, бо яна, на ягоную думку, нясе пагрозу для ўсёй Эўропы. Гаворка ідзе таксама аб магчымым разьмяшчэньні ва Ўкраіне эўрапейскіх сіл для падтрыманьня міру — пасьля спыненьня агню.
Як паведамлялі СМІ, іх аснову павінныя скласьці брытанскі і францускі кантынгенты. Іх разьмяшчэньне, аднак, магчымае толькі ў выпадку падтрымкі з боку ЗША — нават калі амэрыканскія вайскоўцы ня ўвойдуць у склад гэтых сіл. Пра тое ж пойдзе размова падчас візыту ў Вашынгтон прэм’ер-міністра Вялікай Брытаніі Кіра Стармэра. Абодва лідэры, як паведамляецца, паспрабуюць пераканаць Трампа ў тым, што, накіроўваючы сваіх вайскоўцаў, эўрапейскія краіны бяруць на сябе гарантыі бясьпекі для Ўкраіны — чаго і дамагаўся ад іх Вашынгтон.
Прадстаўнікі адміністрацыі ЗША настойваюць на больш хуткім завяршэньні канфлікту, яны перасталі абвінавачваць Расею ў агрэсіі супраць Украіны, а многія зь іх, уключаючы Трампа, выступілі з рэзкімі заявамі ў адрас Кіева. ЗША таксама правялі перамовы з прадстаўнікамі Расеі ў Эр-Рыядзе. Гэта выклікала ва Ўкраіне і краінах ЭЗ асьцярогу, што Вашынгтон паспрабуе дамовіцца з Масквой «праз галаву» Ўкраіны і Эўропы.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе на просьбу груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах вобласьцяў. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, некаторыя яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам. Насуперак заявам Пуціна пра атакі выключна на вайсковыя аб’екты, расейцы пачалі бамбіць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фатаздымкаў, на якіх відаць сотні нябожчыкаў, ахвяраў масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага 2022 году Расея захапіла толькі адзін абласны цэнтар — Херсон. Горад быў акупаваны расейскімі войскамі ў першыя дні вайны фактычна без баёў. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый і ў Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якіх Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 17 лістапада 2024 году тагачасны прэзыдэнт ЗША Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- З прыходам да ўлады ў ЗША прэзыдэнта Дональда Трампа рэзка актывізавалася тэма магчымых мірных перамоваў. Улетку 2025 году Дональд Трамп правёў шэраг сустрэчаў, у тым ліку з Уладзімірам Зяленскім і Ўладзімірам Пуціным. Аднак дамовіцца пра мірнае пагадненьне ці прынамсі пра асабістую сустрэчу прэзыдэнтаў Украіны і Расеі не атрымалася. Агулам мірныя перамовы дагэтуль не далі істотных вынікаў.
- 1 чэрвеня 2025 году на Дзень расейскай авіяцыі Ўкраіна правяла маштабную апэрацыю «Павуціньне». Служба бясьпекі Ўкраіны зладзіла ўдары па авіябазах па ўсёй тэрыторыі Расеі, зьнішчыўшы дзясяткі расейскіх вайсковых самалётаў. Дакладна невядома, адкуль кіраваліся гэтыя дроны і ці выкарыстоўвалі яны штучны інтэлект для нацэльваньня на расейскія самалёты. Паводле ўкраінскага боку, дахі грузавікоў, дзе хаваліся дроны, адчынялі дыстанцыйна, каб дазволіць квадракоптэрам узьлятаць.
- З пачатку 2024 году па цяперашні час украінскія дроны пашкодзілі мноства расейскіх нафаперапрацоўчых заводаў, што прывяло да істотнага скарачэньня вытворчасьці нафтапрадуктаў у Расеі.
- Лінія фронту ва Украіне на працягу 2025 і на пачатку 2026 году заставалася адносна стабільнай. Пры гэтым расейскія войскі павольна прасоўваліся на асобных участках. З кастрычніка 2025 па сакавік 2026 году Расея захапіла каля 1833 км². На пачатку 2026 году ўкраінскія сілы правялі шэраг удалых контратак. У канцы красавіка 2026 году ўпершыню за доўгі час Ўкраіна адваявала больш тэрыторыі, чым страціла.
Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
Форум