Афіцыйны прадстаўнік Дзяржаўнага памежнага камітэту Беларусі Андрэй Бычкоўскі заявіў пра гатовасьць аднавіць міжнародную транспартную камунікацыю з Украінай.
Як паведаміла дзяржаўнае агенцтва БелТА, Андрэй Бычкоўскі адзначыў, што зь беларускага боку пункты пропуску на мяжы з Украінай функцыянуюць, а памежнікі «гатовыя ў сьціслыя тэрміны аднавіць міжнародныя зносіны з сумежным бокам».
Такую заяву афіцыйны прадстаўнік Дзяржаўнага памежнага камітэту Беларусі зрабіў прадстаўнікам замежных СМІ з 9 дзяржаў. Дзяржаўны памежны камітэт Беларусі даў ім магчымасьць наведаць памежжа ў кірунку Ўкраіны па распараджэньні Аляксандра Лукашэнкі.
Кіраўніцтва Беларусі падтрымала агрэсію Расеі супраць Украіны і дазволіла скарыстаць вайсковую інфраструктуру і паветраную прастору для ўварваньня расейскай арміі і абстрэлаў мірных гарадоў Украіны, ахвярамі якіх сталі дзясяткі тысяч цывільных украінцаў.
Украіна з 28 лютага 2022 году закрыла мяжу зь Беларусьсю, спыніла гандаль і пачала ўмацоўваць сваю мяжу на беларускім кірунку, каб зрабіць немагчымым паўторны наступ расейскіх войскаў зь беларускай тэрыторыі.
У перамовах Расеі і Ўкраіны пра абмены палоннымі ўдзельнічаюць дэпутатка Палаты прадстаўнікоў Ірына Касьцевіч і афіцэр КДБ, колішні супрацоўнік амбасады Беларусі ва Ўкраіне Валер Сьцепановіч.
Пасьля пачатку ўкраінскімі войскамі курскай апэрацыі абмен палоннымі перанесьлі на тэрыторыю Беларусі.
Форум