На прэс-канфэрэнцыі пасьля галасаваньня, адказваючы на пытаньні журналістаў, Аляксандар Лукашэнка выказаўся наконт свайго магчымага ўдзелу ў перамовах наконт вайны ва Ўкраіне.
«Уладзімір Зяленскі пастаянна прапагандуе гарантыі і стабільнасьць у рэгіёне. Тады трэба ўлічваць інтарэс усіх бакоў, у тым ліку беларусаў. Латышы, эстонцы, палякі — усе туды ірвуцца. А бяз нашага ўдзелу ня можа быць поўнай бясьпекі. Аднак, каб я з глузду зьехаў, калі безь мяне будуць перамовы, — такога няма», — сказаў Лукашэнка і дадаў, што калі яго на перамовах ня будзе, дык «Пуцін выкажа беларускую пазыцыю».
Таксама ён прапанаваў даслаць ва Ўкраіну «беларускіх міратворцаў».
«Калі ў імя даверу і справядлівасьці, то, акрамя беларускага войска, у іх нічога няма. Гэта ня значыць, што я пашлю ў якасьці міратворцаў сваё войска туды — 70 тысяч — там іх выстраю. Але дзеля таго, каб было так, як дамовяцца — гэта толькі беларускае (войска. — Рэд.). Іншых няма. Усе астатнія будуць цягнуць або на Захад, або на Ўсход», — заявіў Лукашэнка.
Аднак ён лічыць, што ня толькі ўкраінцы, але і Захад не пагодзіцца з адпраўкай беларускіх міратворцаў ва Ўкраіну.
«Ім трэба прапіхнуць сваіх. Але гэта ня вельмі будзе задавальняць расейскі бок. Калі будзе прынята рашэньне аб увядзеньні міратворчага кантынгенту, гэта будзе вельмі сур’ёзная спрэчка», — сказаў Лукашэнка.
Ён дадаў, што «ня рвецца» ва Ўкраіну і, хутчэй за ўсё, на сёньняшні дзень «сваіх людзей туды не зьбіраюся адпраўляць».
Форум