Шэсьць краінаў ЭЗ заклікалі зьнізіць столь цэнаў на расейскую нафту

Арыштаванае ў Фінляндыі судна "Eagle S" — меркаваны танкер ценявога флёту Расеі.
Арыштаванае ў Фінляндыі судна "Eagle S" — меркаваны танкер ценявога флёту Расеі.

Шэсьць краін Эўрапейскага Зьвязу зьвярнуліся да Эўракамісіі з заклікам панізіць так званую столь цэнаў на расейскую нафту, вызначаную раней краінамі «Групы сямі» (G7) на ўзроўні 60 даляраў за барэль.

Пра гэта паведамляюць у панядзелак агенцтва Reuters, DW і СМІ краінаў рэгіёну, у прыватнасьці, швэдзкія онлайн-выданьні.

Дакумэнт падпісалі краіны Паўночнай Эўропы і Балтыі. Міністры замежных спраў гэтых краін лічаць, што зьніжэньне столі цэнаў прывядзе да таго, што даходы Расеі скароцяцца і яна ня зможа ў ранейшых аб’ёмах фінансаваць вайну супраць Украіны.

«Чым ніжэйшыя цэны на расейскую нафту, тым хутчэй настане мір», — заявіла міністар замежных спраў Швэцыі Мальмэр Стэнэгард. Паводле яе падлікаў, зьніжэньне цаны на 10 даляраў за барэль азначала б для Расеі страты ў памеры 200 мільярдаў даляраў за год, што адпавядае прыкладна 15% расейскага вайсковага бюджэту.

Шэраг краін ЭЗ, у тым ліку тых, што падпісалі цяперашні дакумэнт, ужо некаторы час дамагаюцца зьніжэньня столі цэнаў на расейскую нафту, аднак кансэнсусу па гэтым пытаньні ні ў Эўразьвязе, ні ў «Сямёрцы», у працы якой бяруць удзел прадстаўнікі Эўракамісіі, няма. Да вызначанай краінамі Захаду столі цэнаў далучыліся далёка ня ўсе краіны сьвету. Расея прадае сваю нафту галоўным чынам у Кітай і Індыю — як адзначае DW, нафта прадаецца зь вялікімі зьніжкамі адносна сусьветных цэнаў, якія цяпер перавышаюць 80 даляраў за барэль, аднак усё ж больш выгадна, чым па ўсталяваным на Захадзе мінімальным кошце.

У той жа час краіны Захаду робяць дадатковыя захады супраць так званага ценявога флёту, які перавозіць расейскую нафту танкерамі пад сьцягамі трэціх краін. Злучаныя Штаты днямі ўвялі блякавальныя санкцыі супраць двух найбуйнейшых экспартэраў нафты ў Расеі — «Газпром нафты» і «Сургутнафтагазу». Зь імі, а таксама зь дзясяткамі іншых кампаній цяпер забаронена мець фінансавыя адносіны з выкарыстаньнем даляра або амэрыканскай фінансавай сыстэмы. Санкцыі зноў пашырыліся на найбуйнейшую расейскую суднаходную кампанію «Саўкамфлот». Пад абмежаваньні трапілі 183 танкеры, якія, як мяркуецца, адносяцца да ценявога флёту.

Прэс-сакратар прэзыдэнта Расеі Дзьмітрый Пяскоў у адказ на новыя санкцыі ЗША адносна расейскай нафты заявіў, што маршруты экспарту расійскіх энэрганосьбітаў, якія склаліся, «проста так перасячы немагчыма». Пры гэтым, паводле яго слоў, санкцыі могуць прывесьці да «дысбалянсу» на сусьветным рынку нафты.

​
XS
SM
MD
LG