8 кастрычніка ізраільскія вайскоўцы заявілі, што забілі яшчэ аднаго высокапастаўленага камандзіра радыкальнай шыіцкай групоўкі «Хэзбалы».
Сугаіль Хусэйні, які адказваў за лягістыку, бюджэт і кіраваньне «Хэзбалой» — ваенізаванай групоўкай і палітычнай партыяй, якая кантралюе значную частку паўднёвага Лібану — быў забіты ў выніку мэтанакіраванага нападу 7 кастрычніка, гаворыцца ў заяве Арміі абароны Ізраілю (ЦАХАЛ).
«Хусэйні адыгрываў вырашальную ролю ў перадачы зброі паміж Іранам і „Хэзбалой“», — пішуць у заяве і дадаюць, што ён таксама адказваў за разьмеркаваньне сучаснай зброі сярод чальцоў групоўкі і за яе «самыя адчувальныя праекты», у тым ліку апэрацыі супраць Ізраілю.
Армія абароны Ізраілю заявіла, што Хусэйні таксама быў сябрам Рады джыгаду, найвышэйшага вайсковага органу «Хэзбалы», якую Злучаныя Штаты лічаць тэрарыстычнай групоўкай, а Эўразьвяз унёс у чорны сьпіс толькі яе ўзброенае крыло.
«Хэзбала» пакуль не пацьвердзіла забойства Хусэйні.
- 7 кастрычніка, у трагічную гадавіны нападу ХАМАС (прызнаны тэрарыстычнай арганізацыяй у ЗША і Ізраілі) на Ізраіль, у выніку якога загінулі каля 1200 чалавек, «Хэзбала» выпусьціла па тэрыторыі Ізраілю больш за 130 снарадаў. У гэты ж дзень Ізраіль прадэманстраваў гатоўнасьць пашырыць свой наступ на Лібан. Ізраільскія вайскоўцы заявілі, што вайсковая авіяцыя бамбіла аб’екты «Хэзбалы» на поўдні Лібану.
- Пасьля атакі ХАМАС 7 кастрычніка 2023 году Ізраіль пачаў ваенны наступ на Газу. У выніку яго загінулі каля 42 тысяч палестынцаў, сьцьвярджае падкантрольнае ХАМАС Міністэрства аховы здароўя Газы. Каля 90% насельніцтва сэктару Газа былі перамешчаныя, вялікія тэрыторыі былі разбураныя ізраільскімі бамбардзіроўкамі.
- 7 кастрычніка ізраільскія вайскоўцы заявілі, што за апошні год яны разбамбілі больш за 40 тысяч цэляў у сэктары Газа, выявілі 4700 тунэляў і зьнішчылі 1000 ракетных пускавых установак.
- Канфлікт у Газе ўсё яшчэ працягваецца, у той час як Ізраіль цяпер таксама ваюе на другім фронце на поўдні Лібану супраць «Хэзбалы». У апошнія тыдні Ізраіль наносіў авіяўдары па ўсім Лібане, уключаючы Бэйрут, і арганізаваў наземнае ўварваньне на поўдзень Лібану ў сваім імкненьні зьнішчыць магчымасьці і кіраўніцтва «Хэзбалы».
- Ізраільскія вайскоўцы забілі лідэра «Хэзбалы» Хасана Насралу і, магчыма, яго патэнцыйнага пераемніка Гашэма Сафі ад-Дына.
Вайна Ізраілю з ХАМАСам і «Хэзбалой». Асноўнае
- 7 кастрычніка 2023 году Ізраіль зазнаў ракетны ўдар з боку сэктару Газа, а баевікі руху ХАМАС прарваліся на тэрыторыю краіны, забіўшы ня менш за 260 удзельнікаў музычнага фэстывалю і захапіўшы сотні закладнікаў. Некаторых людзей расстрэльвалі проста на вуліцах.
- Уварваньне з сэктару Газа адбылося ў 50-ю гадавіну пачатку вайны Суднага дня 1973 году.
- Армія абароны Ізраілю (ЦАХАЛ) у адказ на атаку пачала ваенную апэрацыю «Жалезныя мячы». Ужо 8 кастрычніка Ізраіль афіцыйна абвясьціў стан вайны.
- ХАМАС папярэдзіў, што будзе забіваць аднаго з закладнікаў кожны раз, калі ізраільскія вайскоўцы будуць бамбіць цывільныя аб’екты ў Газе.
- Іран заявіў, што не бярэ ўдзелу ў вайне, але адкрыта заявіў пра падтрымку дзеяньняў ХАМАС. Найвышэйшы ўладар Ірану аятала Алі Хамэнэі заявіў: «Мы цалуем рукі тым, хто плянаваў напад на сыянісцкі рэжым».
- Колькасьць параненых беларусаў на 10 кастрычніка 2023 году — 3 чалавекі. Стан адной з параненых жанчын цяжкі.
- 10 кастрычніка ў кібуцы Кфар Аза побач з сэктарам Газа выявілі целы дзясяткаў забітых, у тым ліку малых дзяцей.
- Міністар абароны Ізраілю Яаў Галант 11 кастрычніка заявіў, што войска пераходзіць да поўнамаштабнага наступу на сэктар Газа.
- Лібанская ўзброеная групоўка «Хэзбала» 11 кастрычніка абстраляла супрацьтанкавымі ракетамі пазыцыі ізраільскіх вайскоўцаў і заявіла, што забіла і параніла іх.
- Па стане на 17 кастрычніка вядома, што ў Ізраілі з пачатку вайны загінулі трое грамадзян Беларусі.
- Ізраіль у лістападзе 2023 году пайшоў у атаку на сэктар Газа і заявіў аб пашырэньні наземнай апэрацыі.
- 22 лістапада стала вядома, што Ізраіль і ХАМАС у Катары падпісалі пагадненьне аб замірэньні на 4 дні. Пазьней замірэньне падоўжылі, але ўжо 30 лістапада яно спынілася пасьля ракет з Газы па Ізраілі, заявілі ў ЦАХАЛ.
- За час замірэньня з палону ХАМАС было вызвалена 105 закладнікаў, а з ізраільскіх турмаў 240 палестынскіх зьняволеных.
- 6 студзеня Ізраіль заявіў пра тое, што поўнач сэктару Газа зачышчаная ад баевікоў ХАМАС.
«Хэзбала» выпусьціла ракеты па Ізраілі на наступны дзень пасьля нападу ХАМАС, у кастрычніку 2023 году. З таго часу абстрэлы на мяжы адбываюцца амаль штодня. Дзясяткі тысяч жыхароў эвакуавалі з прымежных раёнаў з абодвух бакоў.
«Хэзбала» — ваенізаваная групоўка і палітычная партыя, якая кантралюе значную частку паўднёвага Лібану. Злучаныя Штаты лічаць яе тэрарыстычнай арганізацыяй. Эўрапейскі Зьвяз унёс у свой сьпіс такіх арганізацыяў толькі яе ўзброенае крыло, але не палітычную партыю (партыя «Хэзбалы» прадстаўлена ў парлямэнце Лібану). «Хэзбала» таксама ёсьць часткаю так званай іранскай «восі супраціву» — сеткі іранскіх давераных асобаў і падтрыманых Тэгеранам групаў баевікоў, якія выступаюць супраць Ізраілю і ЗША. - Увосень 2024 году рэзка вырасла супрацьстаяньне на ізраільска-лібанскай мяжы. «Хэзбала» атакавала Ізраіль, а ў Тэль-Авіве вырашылі правесьці сэрыю авіяналётаў, каб зьнішчыць атакавальны патэнцыял «Хэзбалы».
- 23 верасьня Ізраіль распачаў першую з 2006 году наземную апэрацыю на поўдні Лібану, калі пачалася Другая лібанская вайна (Ліпеньская вайна). Апэрацыю назвалі «Стрэлы поўначы».
- 27 верасьня Ізраіль нанёс магутныя ўдары па Лібане і забіў лідэра «Хэзбалы» Хасана Насралу.
- 3 кастрычніка Армія абароны Ізраілю паведаміла пра атаку на аб’екты «Хэзбалы» ў Бэйруце.
- 15 студзеня 2025 году стала вядома пра пагадненьне пра спыненьне агню паміж Ізраілем і ХАМАС, якое павінна пачаць дзейнічаць з 19 студзеня. Ізраільскі бок выпусьціць некалькіх зьняволеных палестынскіх арабаў, а тэрарыстычная групоўка ізраільскіх закладнікаў. Аднак ужо неўзабаве гэты мірны плян правалілі.
- 8 кастрычніка на пасярэдніцкіх перамовах у Эгіпце два бакі ў чарговы раз дамовіліся пра спыненьне агню. Гэта першая частка годы, распрацаванай адміністрацыяй прэзыдэнта Злучаных Штатаў Дональда Трампа.
Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
Форум