У Крыме абвясьцілі надзвычайную сытуацыю
Раніцай 7 кастрычніка ў Генэральным штабе Ўкраіны заявілі, што ў ноч на 7 кастрычніка нанесьлі трапны ўдар па марскім нафтавым тэрмінале ў Феадосіі.
«Феадасійскі тэрмінал — найбольшы ў Крыме ў аб’ёмах перавалкі нафтапрадуктаў, якія выкарыстоўваліся, у тым ліку, і для забесьпячэньня патрэб акупацыйнай арміі РФ», — адзначаецца ў афіцыйным паведамленьні ўкраінскага Генштабу.
У выніку ўдару пачаўся маштабны пажар. Прарасейскія ўлады Крыму абвясьцілі тэхнагенную надзвычайную сытуацыю, спынілі рух прыгарадных цягнікоў на ўчастку Феадосія — Уладзіславаўка.
«Доступ людзей і транспарту ў зону НС абмежаваны», — заявіў кіраўнік прарасейскіх уладаў Феадосіі Ігар Ткачэнка.
Паводле яго, каля 300 чалавек эвакуавалі ў пункты часовага разьмяшчэньня.
Праўкраінскі Telegram-канал «Крымский ветер» апублікаваў некалькі відэазапісаў, на якіх можна пабачыць маштабы пажару. Паводле зьвестак каналу, спачатку ў 4:24 адбыўся першы магутны выбух, а потым яшчэ два. Але перад гэтым не было чуваць гуку бесьпілётнікаў. Над Феадосіяй стаіць вялікае воблака чорнага дыму, якое можна пабачыць за дзясяткі кілямэтраў.
На паўвостраве толькі два такія вялікія нафтавыя тэрміналы — у Феадосіі і ў Севастопалі. Рэзэрвуары разьлічаныя на захоўваньне 250 тысяч кубамэтраў нафтапрадуктаў.
Гэта чацьвёртая атака ўкраінцаў на нафтабазу — у сакавіку 2024 году пашкодзілі магістральны трубаправод перапампоўваньня паліва. Першыя спробы нанесьці ўдары па рэзэрвуарах у Феадосіі адбыліся летась у лістападзе і сьнежні.
У Міністэрстве абароны Расеі паведамілі, што ў ноч на 7 кастрычніка зьнішчылі 21 украінскі дрон, у тым ліку 12 над Крымам.
Расея атакавала ракетамі і дронамі Кіеў і Сумы
Кіраўнік Кіеўскай гарадзкой вайсковай адміністрацыі Сяргей Папко паведаміў, што аскепкі расейскіх ракет упалі ў трох раёнах сталіцы — Саломенскім, Галасеўскім і Шаўчэнкаўскім.
У Саломенскім раёне пашкоджаны дах шматпавярховага дома, адзін з аскепкаў упаў на тэрыторыю мясцовай школы, іншыя — на адкрытай мясцовасьці. Папярэдне, без пацярпелых.
У іншых раёнах аскепкі зьбітых снарадаў таксама знайшлі на адкрытых тэрыторыях.
У Сумах у выніку расейскага абстрэлу дронамі і ракетамі пацярпелі чатыры асобы, у тым ліку адно дзіця.
Ва Ўкраіне зьбілі 32 расейскія дроны, адна з ракет пацэліла ў раён аэрадрому
У апэратыўным камандаваньні Паветраных сіл Украіны паведамілі, што ў ноч і раніцай 7 кастрычніка зьбілі дзьве з трох расейскіх ракет «Кінжал». Адна зь іх пацэліла ў раён вайсковага аэрадрому «Стараканстанцінаў» у Хмяльніцкай вобласьці.
Сродкі супрацьпаветранай абароны Ўкраіны таксама зьбілі 32 дроны, яшчэ 37 згубіліся ў розных рэгіёнах Украіны ў выніку дзейнасьці тэхнікі радыёэлетроннай барацьбы.
Расея атакавала Мікалаеўскую, Кіеўскую, Днепрапятроўскую, Сумскую, Чарнігаўскую, Палтаўскую, Харкаўскую і Хмяльніцкую вобласьці Ўкраіны.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе на просьбу груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах вобласьцяў. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, некаторыя яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам. Насуперак заявам Пуціна пра атакі выключна на вайсковыя аб’екты, расейцы пачалі бамбіць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фатаздымкаў, на якіх відаць сотні нябожчыкаў, ахвяраў масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага 2022 году Расея захапіла толькі адзін абласны цэнтар — Херсон. Горад быў акупаваны расейскімі войскамі ў першыя дні вайны фактычна без баёў. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый і ў Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якіх Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 17 лістапада 2024 году тагачасны прэзыдэнт ЗША Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- З прыходам да ўлады ў ЗША прэзыдэнта Дональда Трампа рэзка актывізавалася тэма магчымых мірных перамоваў. Улетку 2025 году Дональд Трамп правёў шэраг сустрэчаў, у тым ліку з Уладзімірам Зяленскім і Ўладзімірам Пуціным. Аднак дамовіцца пра мірнае пагадненьне ці прынамсі пра асабістую сустрэчу прэзыдэнтаў Украіны і Расеі не атрымалася. Агулам мірныя перамовы дагэтуль не далі істотных вынікаў.
- 1 чэрвеня 2025 году на Дзень расейскай авіяцыі Ўкраіна правяла маштабную апэрацыю «Павуціньне». Служба бясьпекі Ўкраіны зладзіла ўдары па авіябазах па ўсёй тэрыторыі Расеі, зьнішчыўшы дзясяткі расейскіх вайсковых самалётаў. Дакладна невядома, адкуль кіраваліся гэтыя дроны і ці выкарыстоўвалі яны штучны інтэлект для нацэльваньня на расейскія самалёты. Паводле ўкраінскага боку, дахі грузавікоў, дзе хаваліся дроны, адчынялі дыстанцыйна, каб дазволіць квадракоптэрам узьлятаць.
- З пачатку 2024 году па цяперашні час украінскія дроны пашкодзілі мноства расейскіх нафаперапрацоўчых заводаў, што прывяло да істотнага скарачэньня вытворчасьці нафтапрадуктаў у Расеі.
- Лінія фронту ва Украіне на працягу 2025 і на пачатку 2026 году заставалася адносна стабільнай. Пры гэтым расейскія войскі павольна прасоўваліся на асобных участках. З кастрычніка 2025 па сакавік 2026 году Расея захапіла каля 1833 км². На пачатку 2026 году ўкраінскія сілы правялі шэраг удалых контратак. У канцы красавіка 2026 году ўпершыню за доўгі час Ўкраіна адваявала больш тэрыторыі, чым страціла.
Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
Форум