Лінкі ўнівэрсальнага доступу

Краіны NATO пачалі пастаўкі Ўкраіне самалётаў F-16


Самалёт F-16
Самалёт F-16

Хаўрусьнікі па NATO абвясьцілі, што пачалі перакідваць самалёты F-16 ва Ўкраіну, узмацніўшы абяцаньні Кіеву аб канчатковым сяброўстве ў альянсе на саміце пад 75-ю гадавіну альянсу.

Прэзыдэнт ЗША Джо Байдэн асабіста вітаў 31 лідэра краінаў альянсу, а затым заклікаў вытрымліваць гонку са збройнай вытворчасьцю Расеі, якая рэзка павялічылася за два гады пасьля ўварваньня расейцаў ва Ўкраіну, піша AFP.

«Мы можам — і будзем — абараняць кожны сантымэтар тэрыторыі NATO, і мы зробім гэта разам», — сказаў Байдэн Паўночнаатлянтычнай радзе, афіцыйнаму кіроўнаму органу альянсу.

Байдэн абвясьціў, што Данія і Нідэрлянды пачалі пасылаць ва Ўкраіну самалёты F-16 амэрыканскай вытворчасьці, выконваючы леташняе ключавое абяцаньне Кіеву, які з усіх сілаў спрабуе атрымаць парытэт у паветры з Расеяй.

Раней Байдэн анансаваў новыя сыстэмы супрацьпаветранай абароны Ўкраіны і заявіў, што ЗША пагадзіліся пэрыядычна разьмяшчаць у Нямеччыне ракеты далёкага радыюсу дзеяньня.

Але Байдэн і канцлер Нямеччыны Оляф Шольц выказалі занепакоенасьць тым, што прыцягненьне Кіева ў альянс цяпер будзе фактычна ўступленьнем у вайну з Расеяй, якая валодае ядзернай зброяй, бо яна акупуе ўчасткі тэрыторыі Ўкраіны.

Прэм’ер-міністар Вялікай Брытаніі Кейр Стармэр, наведаўшы краіну празь некалькі дзён пасьля таго, як яго Лейбарысцкая партыя прыйшла да ўлады, паабяцаў Зяленскаму, што Брытанія, у адрозьненьне ад Злучаных Штатаў, аб’яднаная ў падтрымцы Ўкраіны. Стармэр даў зразумець, што няма праблем з выкарыстаньнем Украінай брытанскіх ракет для нанясеньня ўдару па тэрыторыі Расеі, што выклікала папрок з боку Масквы.

Вайна Расеі супраць Украіны

  • А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
  • Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
  • Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
  • 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
  • З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
  • Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
  • 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
  • У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
  • 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
  • У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
  • Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
  • Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.

Форум

Камэнтаваць тут можна праз Disqus. Калі вы ў Беларусі, любы камэнтар можа быць падставай для перасьледу з боку ўладаў.
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG