Лінкі ўнівэрсальнага доступу

СБУ заявіла пра новыя доказы абстрэлу Расеяй ракетай Х-101 па дзіцячым шпіталі ў Кіеве


Наступствы ракетнай атакі Расеі на шпіталь «Охматдит». Кіеў, 8 ліпеня 2024
Наступствы ракетнай атакі Расеі на шпіталь «Охматдит». Кіеў, 8 ліпеня 2024

Служба бясьпекі Ўкраіны заяўляе аб атрыманьні новых доказаў, якія пацьвярджаюць, што Расея нанесла ўдар па дзіцячай лякарні «Охматдит» ракетай Х-101.

Як піша ў тэлеграме прэс-служба ведамства, у прыватнасьці, на месцы трагедыі знайшлі абломак рухавіка крылатай ракеты Х-101.
Акрамя таго, сьледчыя СБУ выявілі:

  • абломак мэханізму адкрыцьця крылаў ракеты Х-101;
  • абломак блёку пастаноўкі перашкод ракеты Х-101;
  • сярэднюю частку корпусу крылатай ракеты Х-101 на фота пад заваламі;
  • абцякальнік хваставога адсеку і абломак гідраблёку крылатай ракеты Х-101;
  • абломкі кажуха рухавіка крылатай ракеты Х-101 з інвэнтарным (унутраны бок) і сэрыйным нумарам (вонкавы бок).

Сьледча-апэратыўная група СБУ працуе на месцы трагедыі зь першых хвілін і робіць усё магчымае, каб сабраць кожны рэчавы доказ.
«Высновы экспэртаў адназначныя — гэта быў мэтанакіраваны ўдар расейцаў. Пра гэта сьведчаць ня толькі абломкі ракеты, знойдзеныя на месцы ўдару, але і аналіз дадзеных траекторыі палёту, характар пашкоджаньняў, а таксама вялікая колькасьць відэа- і фотаматэрыялаў», — гаворыцца ў паведамленьні.

У СБУ таксама адзначаюць, што характар разбурэньняў (цалкам зьнішчаны двухпавярховы корпус лякарні, навакольныя будынкі маюць значныя пашкоджаньні), уласьцівы менавіта баявой частцы Х-101 (400 кг), такія разбурэньні ні ў якім разе не маглі быць выкліканы ЗРК NASAMS, баявыя часткі ракет да якой прыкладна ў 20 разоў менш магутныя.

Прапорцыі, форма і памеры ракеты, зафіксаванай на відэа, якія ёсьць у адкрытым доступе, цалкам адпавядаюць ракеце Х-101 і, наадварот, не характэрныя для АКР, нанясеньне ўдару па дзіцячай лякарні «Охматдит» менавіта крылатай ракетай авіяцыйнага базаваньня Х-101 зафіксавана матэрыяламі аб’ектыўнага кантролю з дапамогай радараў, дадаюць ва ўкраінскіх спэцслужбах.

8 ліпеня расейскія войскі нанесьлі ракетны ўдар адразу па некалькіх гарадах Украіны. Масавы ўдар па Ўкраіне нанесьлі больш як 40 ракетамі розных тыпаў, заявіў прэзыдэнт Украіны Ўладзімір Зяленскі. Расея атакавала Кіеў, Дніпро, Крывы Рог, Славянск і Краматорск.

На гэты момант вядома пра 37 чалавек, якія загінулі, і больш за 140 параненых.

Сярод іншых аб’ектаў ад расейскай ракеты пацярпела адно з памяшканьняў дзіцячай лякарні «Охматдит» у Кіеве. Пашкоджаны будынак, у якім дзеці праходзілі дыяліз, паведаміў міністар аховы здароўя Ўкраіны Віктар Ляшко. Служба бясьпекі Ўкраіны назвала атаку «тэрарыстычным актам» і адкрыла з гэтай нагоды крымінальную справу.

Паводле папярэдніх зьвестак сьледзтва, Узброеныя сілы Расеі для атакі на мэдычную ўстанову выкарысталі стратэгічную крылатую ракету Х-101.

Вайна Расеі супраць Украіны

  • А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
  • Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
  • Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
  • 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
  • З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
  • Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
  • 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
  • У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
  • 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
  • У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
  • Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
  • Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.

Форум

Камэнтаваць тут можна праз Disqus. Калі вы ў Беларусі, любы камэнтар можа быць падставай для перасьледу з боку ўладаў.
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG