Вусаў: Лукашэнка спрабуе перахапіць у апазыцыі ініцыятыву

Дзьмітры Гурневіч

13 чэрвень 2024, 19:30

У абарачэньне ў Беларусі ўводзіцца новы тэрмін «беларускі сьвет». Пра гэта расказаў старшыня Акадэміі навук Уладзімер Гусакоў, патлумачыўшы, што гэта важна для выпрацоўкі беларускай нацыянальнай ідэі.

А Лукашэнка сёньня прызначыў новага міністра інфармацыі. Адказным за ідэалёгію стаў былы кіраўнік АНТ Марат Маркаў.

Пра ідэалёгію лукашэнкаўскага рэжыму мы сёньня і паразмаўляем з палітолягам і прадстаўніком руху «Вольная Беларусь» Паўлам Вусавым.

На яго думку, прызначэньнем на пасаду міністра інфармацыі Маркава Лукашэнка адзначыў яго за псыхалягічны і маральны ціск і маніпуляцыі супраць прадстаўнікоў апазыцыі.

«Нічога ў інфармацыйнай палітыцы ня зьменіцца. Яна будзе накіраваная на кансалідацыю сыстэмы, на легітымізацыю, на забесьпячэньне інфармацыйнай падтрымкі рэжыму Лукашэнкі, а таксама сыстэмы новага парадку, які ўсталяваўся ў Беларусі. Інфармацыйныя мэханізмы сталі вельмі важным элемэнтам стварэньня нэататалітарнага рэжыму ў Беларусі. Уся інфармацыйная прастора падпарадкаваная дзяржаве. Магчыма, яна стане больш крэатыўнай. Напярэдадні выбараў 2025 году задачай усіх афіцыйных СМІ будзе стварэньне прывабнага і неканкурэнцыйнага вобразу Лукашэнкі. Кансалідацыя рэжыму і дыскрэдытацыя апазыцыі будзе неабходнай. Маркаў мае такую неабходную творчую сілу», — кажа Вусаў.

Цалкам інтэрвію глядзіце ў відэафармаце на Youtube.

На думку палітоляга, рэжым перад выбарамі 2025 году будзе спрабаваць знайсьці новыя электаральныя рэсурсы, каб прэзыдэнцкія выбары прайшлі максымальна лагодна.

«Яны хочуць, каб ня было ніякіх грамадзкіх ці сыстэмных збояў. Адсюль рэпрэсіі і зачысткі. А зь іншага боку — спробы пераняць нешта ў канцэпцыях ад апазыцыі. Яны хочуць стварыць нейкія агульныя пункты з нацыянальна-арыентаванымі беларусамі, каб магчы імі маніпуляваць і збудаваць хоць неяк сваю легітымнасьць», — лічыць Павал Вусаў.

«ПіК Свабоды»

«ПіК Свабоды» — гэты YouTube-праграма і падкаст пра самыя важныя падзеі для Беларусі і беларусаў.

Чатыры разы на тыдзень — з панядзелка па чацьвер — дасьведчаныя журналісты і рэдактары Свабоды выбіраюць для вас галоўныя навіны дня і тлумачаць, што яны значаць.

Па пятніцах мы рыхтуем тыднёвы аналітычны выпуск, у якім разам з вартымі даверу экспэртамі разьбіраем працэсы і тэндэнцыі ў палітыцы, эканоміцы, грамадзтве і культуры.