Цыстэрна з палівам і вагон зь піламатэрыяламі загарэліся на станцыі Катлубань у Валгаградзкай вобласьці Расеі. Там сышлі з рэек вагоны грузавога цягніка. Узгараньне ўдалося патушыць, паведаміла рэгіянальнае ўпраўленьне МНС.
«Пажарныя разьлікі першага пажарна-ратавальнага атраду апэратыўна зьліквідавалі ўзгараньне ў 03:38», — гаворыцца ў афіцыйным паведамленьні МНС.
Мясцовыя СМІ і тэлеграм-каналы выказваюць здагадку, што прычынай здарэньня стала работа бесьпілётніка. Прыволская чыгунка назвала прычынай «умяшаньне староньніх асобаў».
Рух цягнікоў прыпынялі, але ўсё ж аднавілі па адной каляіне ў рэвэрсіўным рэжыме. Інцыдэнт прывёў да затрымкі двух чыгуначных саставаў.
Напярэдадні бесьпілётнікі напалі на Валгаградзкі НПЗ, пасьля ўдару на прадпрыемстве пачаўся пажар.
Форум