Улады Беларусі «ўсімі сіламі спрабуюць запалохаць і прымусіць замаўчаць журналістаў і СМІ», так Фэдэральнае міністэрства замежных спраў Нямеччыны адрэагавала на прызнаньне 29 красавіка беларускай рэдакцыі нямецкай медыякампаніі Deutsche Welle «экстрэмісцкім фармаваньнем».
Гэты факт нямецкае зьнешнепалітычнае ведамства назвала «яшчэ адным кавалачкам мазаікі ў арсэнале рэпрэсій [рэжыму Аляксандра] Лукашэнкі». «Праўду нельга забараніць», — падкрэсьлілі ў МЗС ФРГ, піша Позірк.
Прэс-сакратар МЗС Сэбасцьян Фішэр на прэс-канфэрэнцыі ў той жа дзень назваў рашэньне беларускіх уладаў адносна «DW Беларусь» «неабгрунтаваным і няправільным». Адзначыўшы ў той жа час, што «гаворка ідзе аб пазбаўленьні беларускага народа магчымасьці атрымліваць незалежную інфармацыю», прадстаўнік ведамства прызнаў, што гэта «адпавядае дзеяньням рэжыму, які вельмі абмежаваў мэдыйную прастору». «Мы асудзілі гэта», — сказаў Фішэр.
«Мы самым рашучым чынам асуджаем рашэньне беларускага МУС. Абвінавачаньні зьяўляюцца беспадстаўнымі і не адпавядаюць рэальнай працы нашай беларускай рэдакцыі», — заявіў гэндырэктар DW Пэтэр Лімбург наконт рашэньня беларускіх уладаў прызнаць «экстрэмісцкім фармаваньнем» рэдакцыю «DW Беларусь».
29 красавіка МУС Беларусі прызнала «DW Беларусь» «экстрэмісцкім фармаваньнем». Ведамства заявіла пра нібыта «замах на сувэрэнітэт і грамадзкую бясьпеку Беларусі, дыскрэдытацыю і абразу службовых асоб» з боку гэтага СМІ.
Па словах Пэтэра Лімбурга, такое рашэньне дэманструе страх Менску перад свабоднымі журналістамі.
«Рэжым у Беларусі баіцца незалежных СМІ і робіць усё магчымае, каб пазбавіць беларусаў доступу да свабоднай інфармацыі», — адзначыў Лімбург.
Ён падкрэсьліў, што журналістаў мэдыякампаніі Deutsche Welle не запалохае новае рашэньне ўладаў у Менску.
«Для нас гэта забарона зьяўляецца заклікам працаваць яшчэ больш старанна», — дадаў ён.
- У сакавіку 2022 году МУС Беларусі аб’явіў «экстрэмісцкімі матэрыяламі» кантэнт Deutsche Welle ў Беларусі.
Змаганьне ўлады супраць недзяржаўных СМІ
Пасьля сфальшаваных прэзыдэнцкіх выбараў 2020 году і сілавога здушэньня агульнанацыянальных пратэстаў аўтарытарны рэжым Аляксандра Лукашэнкі пачаў сыстэматычна выкарыстоўваць антыэкстрэмісцкае заканадаўства для барацьбы з іншадумствам, ліквідацыі незалежных мэдыя і перасьледу палітычных апанэнтаў.
Улады заблякавалі сайты незалежных мэдыя і спынілі публікацыю непадкантрольных друкаваных выданьняў, пазбавілі акрэдытацыі журналістаў іншаземных мэдыя і разграмілі офісы самых уплывовых СМІ. Сотні беларускіх рэпартэраў прайшлі праз арышты, дзясяткі застаюцца ў турмах. Усе незалежныя мэдыя, якія асьвятляюць грамадзка-палітычны парадак дня ў Беларусі, цяпер працуюць выключна з-за мяжы.
Ад 2021 году ўлады пачалі масава абвяшчаць вэб-сайты і асобныя ўліковыя запісы ў сацыяльных сетках незалежных мэдыя, палітычных і грамадзкіх арганізацый, ініцыятыў і проста блогераў «экстрэмісцкімі матэрыяламі», а іх аўтараў «экстрэмісцкімі фармаваньнямі» — часта без судовага разгляду.
Рэспубліканскі сьпіс экстрэмісцкіх матэрыялаў вядзе Міністэрства інфармацыі Беларусі. На дадзены момант у сьпісе на 1469 старонках пералічаны тысячы «экстрэмісцкіх матэрыялаў», за выкарыстаньне якіх прадугледжаная адказнасьць. У сьпісе — сайты, тэлеграм-каналы, акаўнты, старонкі ў сацыяльных сетках, відэаролікі і артыкулы ў інтэрнэце, маркі, значкі, CD-дыскі, а таксама кнігі, у тым ліку мастацкія.
На канец 2024 году больш за 6500 онлайн-рэсурсаў былі забароненыя такім чынам. За любое ангажаваньне з уключанымі ў экстрэмісцкі сьпіс рэсурсамі — ці гэта «падабайка», ці камэнтар, ці падпіска на канал — у Беларусі пагражае крымінальная адказнасьць. Удзел у «экстрэмісцкім фармаваньні» можа карацца турэмным зьняволеньнем да 10 гадоў.
Ужо тысячы беларусаў прайшлі праз штрафы, арышты і турэмнае зьняволеньне за «экстрэмізм».
Паводле ацэнкі Ўпраўленьня Вярхоўнага камісара ААН у правах чалавека, улады Беларусі «выкарыстоўваюць ярлык „экстрэмізм“ для падаўленьня іншадумства, адвольна клясыфікуючы дзеяньні, апісаныя як распаўсюд ілжывай інфармацыі, абразу службовых асобаў, дыскрэдытацыю інстытутаў, арганізацыю масавых беспарадкаў, заклікі да санкцый і распальваньне сацыяльнай варожасьці, як „экстрэмісцкія“, якія падлягаюць крымінальнаму перасьледу».
Форум