Лінкі ўнівэрсальнага доступу

У Лукашэнкі вызначылі дату правядзеньня Ўсебеларускага народнага сходу


Усебеларускі народны сход, 11 лютага 2021 году. Ілюстрацыйнае фота
Усебеларускі народны сход, 11 лютага 2021 году. Ілюстрацыйнае фота

Дэлегаты сходу разгледзяць новую Канцэпцыю нацыянальнай бясьпекі і ваенную дактрыну краіны. Усебеларускі народны сход таксама будзе вызначаць сьвяточныя і памятныя дні, ухвальваць кадравыя рашэньні.

Кіраўнік ураду Беларусі Раман Галоўчанка паведаміў, што першае пасяджэньне Ўсебеларускага народнага сходу, які пасьля зьменаў у Канстытуцыю мае новыя паўнамоцтвы, адбудзецца 24-25 красавіка.

«У першы дзень у асноўным будуць разглядацца пытаньні арганізацыйна-выбарныя, таму што пасяджэньне асаблівае. Трэба будзе рэалізаваць шэраг працэдур, якія прама прадугледжвае закон: выбраць рабочыя органы, лічыльную камісію, старшыню, намесьніка старшыні, прэзыдыюм Усебеларускага народнага сходу. У другі дзень будуць разглядацца пытаньні, уключаныя ў парадак дня», — працытавала Рамана Галоўчанку дзяржаўнае інфармацыйнае агенцтва БелТА.

Прэм’ер-міністар Беларусі нагадаў, што дэлегаты сходу разгледзяць новую Канцэпцыю нацыянальнай бясьпекі і ваенную дактрыну краіны. Паводле яго, Усебеларускі народны сход будзе вызначаць сьвяточныя і памятныя дні, ухвальваць кадравыя рашэньні.

На нарадзе Аляксандар Лукашэнка заявіў, што ў падрыхтоўцы пасяджэньня трэба арыентавацца на досьвед якаснай «арганізацыі прэзыдэнцкіх выбараў у Расеі».

«Гэта і ўрачыста павінна быць, і, галоўнае, зьмястоўна. Каб было, як выбары ў Расеі, — камар носам не падлезе. Каб нас потым не папракалі. Усё цяпер сканцэнтравана на нас. У Расеі бурных падзей не плянуецца, навокал таксама. Засталося ў нас правядзеньне Ўсебеларускага народнага сходу. Стаўкі асобных нашых беглых і Захаду на тое, каб паспрабаваць як мага больш унесьці дэзарганізацыю і развал у часе пасяджэньня і ўхваленьня рашэньня, — мы такога падарунку ім паднесьці не павінны», — заявіў Лукашэнка.

12 сакавіка ў Беларусі пачаўся працэс вылучэньня кандыдатаў у дэлегаты Ўсебеларускага народнага сходу (УНС). 290 дэлегатаў гэтага органа вылучаць мясцовыя саветы дэпутатаў рознага ўзроўню, яшчэ 400 — тэрытарыяльныя структуры і «суб’ектаў грамадзянскай супольнасьці». Пры гэтым адна і тая ж асоба ня можа быць кандыдатам у дэлегаты УНС ад «грамадзянскай супольнасьці» і ад мясцовых саветаў дэпутатаў.

25 лютага ў Беларусі ўпершыню прайшлі аб’яднаныя выбары ў Палату прадстаўнікоў і мясцовыя саветы.

  • Паводле абноўленай рэдакцыі Канстытуцыі, УНС зьяўляецца «найвышэйшым прадстаўнічым органам народаўладзьдзя». Максымальная колькасьць дэлегатаў УНС — 1200, тэрмін іх паўнамоцтваў — пяць гадоў. Пасяджэньні УНС павінны праводзіцца не радзей як адзін раз на год.
  • УНС будзе зацьвярджаць асноўныя кірункі ўнутранай і замежнай палітыкі, вайсковую дактрыну, канцэпцыю нацыянальнай бясьпекі, праграмы сацыяльна-эканамічнага разьвіцьця Беларусі; у яго будзе права заканадаўчай ініцыятывы, ён зможа прапаноўваць зьмены і дапаўненьні ў Канстытуцыю, разглядаць пытаньне пра легітымнасьць выбараў ды інш.
  • У 2024 годзе ўпершыню ў Беларусі пройдуць аб’яднаныя выбары ў Палату прадстаўнікоў і мясцовыя Саветы. Адзіны дзень галасаваньня прызначаны на 25 лютага. На працягу 60 дзён пасьля яго адбудзецца першае пасяджэньне «ўсебеларускага народнага сходу» ў новым статусе. Вылучэньне кандыдатаў ва УНС пройдзе з 12 па 31 сакавіка.

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG