Лінкі ўнівэрсальнага доступу

У Расеі пачалося трохдзённае галасаваньне на выбарах прэзыдэнта. Пуцін ідзе на на пяты тэрмін


Выбарчыя кабінкі ў Расеі
Выбарчыя кабінкі ў Расеі

Пятніца 15 сакавіка ў Расеі — першы дзень галасаваньня на прэзыдэнцкіх выбарах. Упершыню яно праходзіць тры дні — пачынаецца 15 сакавіка і заканчваецца асноўным днём выбараў у нядзелю, 17 сакавіка.

Празь некалькі гадзін пасьля пачатку галасаваньня на сэрвісах, дзе праводзіцца дыстанцыйнае электроннае галасаваньне (ДЭГ) — «Дзяржаўных паслугах» і партале mos.ru — зьявіліся паведамленьні аб магчымых збоях у іх працы. У паведамленьнях гаворыцца, што сыстэмы працуюць у рэжыме «электроннай чаргі».

Участкі для галасаваньня таксама будуць адкрытыя на акупаваных тэрыторыях Украіны — на падкантрольнай Расеі тэрыторыі Запароскай, Херсонскай, Данецкай і Луганскай вобласьцяў, а таксама ў анэксаваным Крыме.

Мясцовыя жыхары на падкантрольных расейскім уладам тэрыторыях Украіны паведамлялі, што іх прымушаюць да ўдзелу ў галасаваньні.

Уладзімір Пуцін, які кіруе Расеяй з 2000 году, балятуецца на пяты тэрмін. Акрамя дзейнага прэзыдэнта, на выбарах тры кандыдаты — Уладзіслаў Даванкоў, віцэ-сьпікер Думы ад партыі «Новыя людзі», дэпутаты Думы Мікалай Харытонаў ад партыі КПРФ і Леанід Слуцкі ад ЛДПР. Усім кандыдатам ад непарлямэнцкіх партыяў і самавылучэнцам, якія зьбіралі подпісы, Цэнтральная выбарчая камісія ў рэгістрацыі адмовіла.

Пачаткова на пасаду прэзыдэнта прэтэндавалі 15 кандыдатаў. Подпісы для рэгістрацыі ня мусілі толькі тыя, каго вылучылі партыі, прадстаўленыя ў Думе — Даванкоў, Харытонаў і Слуцкі. За Пуціна сабралі подпісы як за самавылучэнца.

Журналістку з Ржэва Кацярыну Дунцову ЦВК не дапусьціла нават да збору подпісаў, спаслаўшыся на памылкі ў яе дакумэнтах аб вылучэньні. Пасля адмовы Дунцова зьвярнулася ў Вярхоўны суд і заклікала сваіх прыхільнікаў падтрымаць іншага прэтэндэнта Барыса Надзеждзіна.

Надзеждзіну ўдалося сабраць больш за 200 тысяч подпісаў у падтрымку свайго вылучэньня. ЦВК выявіла ў пададзеных ім подпісах больш за 15% памылак пры дапушчальных 5%. Аспрэчыць адмову ў судах яму не ўдалося.

Выбары, якія праходзілі ў Расеі ў апошнія гады, незалежныя назіральнікі і экспэрты ацэньвалі як несвабодныя і несумленныя. Улады ўмешваюцца ў выбарчы працэс, ствараюць перавагі праўладным кандыдатам, у шэрагу выпадкаў ідзецца і пра простыя фальсыфікацыі. На прэзыдэнцкіх выбарах няма незалежных міжнародных назіральнікаў, сурʼёзна абмежаваныя таксама магчымасьці назіраньня для расейскіх грамадзян.

Перамогу Пуціна, які ў істоце кантралюе ўсе вагары ўлады ў краіне, многія камэнтатары называюць перадвызначанай. Раней СМІ з спасылкай на крыніцы пісалі, што адміністрацыя прэзыдэнта хоча забясьпечыць Пуціну ня менш як 80% пры высокай яўцы. Нядаўняе апытаньне дзяржаўнага сацыялягічнага цэнтру паказала, што за дзейнага прэзыдэнта гатовыя прагаласаваць ня менш за 75% рэспандэнтаў.

Расейская апазыцыя заклікала ўсіх, хто ня згодны з палітыкай Уладзіміра Пуціна, прыйсьці апоўдні 17 сакавіка на выбарчыя ўчасткі, выказаўшы такім чынам свой негалосны пратэст. Ідэю падтрымалі ў тым ліку каманда памерлага ў лютым у калёніі Аляксея Навальнага і Міхаіл Хадаркоўскі.

Пракуратура ў адказ прыгразіла крымінальнай адказнасьцю за «перашкоду свабоднаму ажыцьцяўленьню грамадзянамі сваіх выбарчых правоў і рабоце выбарчых камісіяў». Адпаведны артыкул Крымінальнага кодэксу РФ прадугледжвае за гэта да пяці гадоў калёніі.

Удава Аляксея Навальнага Юлія ў калёнцы ў газэце The Washington Post заклікала краіны Захаду не прызнаваць вынікаў выбараў і не лічыць Уладзіміра Пуціна легітымным кіраўніком дзяржавы.

Шэраг дэпутатаў Эўрапарлямэнту і іншых палітыкаў таксама заклікалі не прызнаваць вынікі выбараў прэзыдэнта Расеі і, такім чынам, легітымнасць Пуціна. Яны ўказваюць як на галасаваньне на акупаваных тэрыторыях, так і на прынятыя папраўкі да Канстытуцыі, якія дазваляюць Пуціну балятавацца на пяты тэрмін. Лідэры заходніх краін не казалі аб магчымасьці непрызнаньня вынікаў выбараў.

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG