Паводле папярэдніх зьвестак, мяжу ў рамках сумеснай апэрацыі перайшлі ўзброеныя фармаваньні Легіён «Свабода Расеі», Расейскі добраахвотніцкі корпус і Сібірскі батальён. Яны складаюцца ў асноўным з расейцаў, якія ваююць на баку Ўкраіны.
У Курскай вобласьці баі, згодна з паведамленьнямі, разгарнуліся ў раёне населенага пункту Цёткіна. Таксама ў сеціве зьявілася відэа, на якім, як сьцьвярджаецца, украінскі танк едзе па ўскраіне белгарадзкага пасёлку Горкаўскі.
З словаў расейскага апазыцыйнага палітыка Ільлі Панамарова, які жыве ў Кіеве і якога зьвязваюць з адным з добраахвотніцкіх падразьдзелаў, прымежнае паселішча Лазавая Рудка ў Белгарадзкай вобласьці «цалкам пад кантролем вызваленчых сілаў».
Легіён «Свабода Расеі» раніцай у аўторак апублікаваў відэа, зь якога вынікае, што атака можа быць зьвязана з плянаванымі выбарамі прэзыдэнта Расеі. Пазьней у тэлеграм-канале Легіёну зьявілася відэа, на якім, як сьцьвярджаецца, зафіксаваны пераход мяжы.
Расейскі праваенны канал WarGonzo з спасылкай на крыніцы піша, што мяжу з боку Харкаўскай вобласьці спрабавалі прарваць каля 50 чалавек. Яны нібыта былі адкінутыя на зыходныя пазыцыі. WarGonzo таксама паведамляе, што дывэрсанты спрабавалі трапіць у Цёткіна, але іх адціснулі.
Карэспандэнт расейскага дзяржаўнага каналу ВГТРК Андрэй Рудэнка паведаміў, што раніцай у аўторак узброеныя фармаваньні на бронетранспартэрах спрабавалі правесьці «выведку боем» у Курскай вобласьці. Паводле зьвестак Рудэнкі, частка дывэрсантаў загінула, «астатнія адышлі».
Расейскай службе Радыё Свабода ўдалося геалякаваць відэа Легіёна з ударам па БТР. Ён знаходзіўся ў цэнтры пасёлка на вуліцы Леніна паміж дамамі 162 і 164.
Паведамляецца, што ў Цёткіне раненьні атрымалі два чалавекі. Паводле «Базы», адзін з параненых — мясцовы жыхар. Інфармацыя пра другога ўдакладняецца. Паводле папярэдніх зьвестак, бой там працягваецца. Працуе артылерыя.
Афіцыйна Масква і Кіеў паведамленьня аб прарыве мяжы ў дзьвюх расейскіх вобласьцях не камэнтавалі.
Прадстаўнік вайсковай выведкі Міністэрства абароны Ўкраіны Андрэй Юсаў у размове з прэсай адзначыў, што Легіён «Свабода Расеі», Расейскі добраахвотніцкі корпус і Сібірскі батальён на тэрыторыі Расеі дзейнічаюць як самастойныя падразьдзелы, бо складаюцца з расейцаў.
«Яны, у рэшце рэшт, знаходзяцца ў сябе дома. Імаверна, зараз адбываецца сумесная апэрацыя гэтых падразьдзелаў», — падае словы Юсава ўкраінскі «24 Канал».
Вядома, што частка байцоў расейскіх добраахвотнікаў — колішнія ўдзельнікі розных ультраправых арганізацый. У цэлым яны складаюцца зь людзей рознай адукацыі, сацыяльных клясаў і палітычных поглядаў, якія выступілі супраць імпэрскай палітыкі Пуціна.
Міністэрства абароны Расеі пацьвердзіла баявыя дзеяньні на мяжы. Паводле яго вэрсіі, спроба ня ўдалася.
Ва ўмовах баявых дзеяньняў апэратыўна праверыць заявы бакоў немагчыма.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе на просьбу груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах вобласьцяў. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, некаторыя яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам. Насуперак заявам Пуціна пра атакі выключна на вайсковыя аб’екты, расейцы пачалі бамбіць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фатаздымкаў, на якіх відаць сотні нябожчыкаў, ахвяраў масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага 2022 году Расея захапіла толькі адзін абласны цэнтар — Херсон. Горад быў акупаваны расейскімі войскамі ў першыя дні вайны фактычна без баёў. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый і ў Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якіх Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 17 лістапада 2024 году тагачасны прэзыдэнт ЗША Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- З прыходам да ўлады ў ЗША прэзыдэнта Дональда Трампа рэзка актывізавалася тэма магчымых мірных перамоваў. Улетку 2025 году Дональд Трамп правёў шэраг сустрэчаў, у тым ліку з Уладзімірам Зяленскім і Ўладзімірам Пуціным. Аднак дамовіцца пра мірнае пагадненьне ці прынамсі пра асабістую сустрэчу прэзыдэнтаў Украіны і Расеі не атрымалася. Агулам мірныя перамовы дагэтуль не далі істотных вынікаў.
- 1 чэрвеня 2025 году на Дзень расейскай авіяцыі Ўкраіна правяла маштабную апэрацыю «Павуціньне». Служба бясьпекі Ўкраіны зладзіла ўдары па авіябазах па ўсёй тэрыторыі Расеі, зьнішчыўшы дзясяткі расейскіх вайсковых самалётаў. Дакладна невядома, адкуль кіраваліся гэтыя дроны і ці выкарыстоўвалі яны штучны інтэлект для нацэльваньня на расейскія самалёты. Паводле ўкраінскага боку, дахі грузавікоў, дзе хаваліся дроны, адчынялі дыстанцыйна, каб дазволіць квадракоптэрам узьлятаць.
- З пачатку 2024 году па цяперашні час украінскія дроны пашкодзілі мноства расейскіх нафаперапрацоўчых заводаў, што прывяло да істотнага скарачэньня вытворчасьці нафтапрадуктаў у Расеі.
- Лінія фронту ва Украіне на працягу 2025 і на пачатку 2026 году заставалася адносна стабільнай. Пры гэтым расейскія войскі павольна прасоўваліся на асобных участках. З кастрычніка 2025 па сакавік 2026 году Расея захапіла каля 1833 км². На пачатку 2026 году ўкраінскія сілы правялі шэраг удалых контратак. У канцы красавіка 2026 году ўпершыню за доўгі час Ўкраіна адваявала больш тэрыторыі, чым страціла.
Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.