Лінкі ўнівэрсальнага доступу

Байдэн і Трамп атрымалі перамогу на праймэрыз у Супэраўторак


Дональд Трамп і Джо Байдэн, каляж
Дональд Трамп і Джо Байдэн, каляж

У ЗША 5 сакавіка ў 15 штатах прайшлі першасныя партыйныя выбары, падчас якіх вызначаецца, каго з кандыдатаў намінуюць у прэзыдэнты ад Дэмакратычнай і Рэспубліканскай партыяў.

Паводле папярэдніх зьвестак, у Рэспубліканскай партыі перамогу ў 13 з 15 штатаў зь вялікай перавагай атрымаў былы прэзыдэнт Дональд Трамп, падлічыла Расейская служба Радыё Свабода. Ягоная суперніца ў барацьбе за намінацыю былая губэрнатарка Паўднёвай Караліны, экс-амбасадарка ЗША ў ААН Нікі Гэйлі перамагла толькі ў адным штаце — Вэрмонце. Вынікі галасаваньня на Алясцы зьявяцца раніцай усходнеамэрыканскага часу.

Прэзыдэнт Джо Байдэн, які балятуецца на другі прэзыдэнцкі тэрмін, пераканаўча перамог ува ўсіх штатах. У яго няма сур’ёзных супернікаў у барацьбе за намінацыю.

Так званы Супэраўторак — ключавая падзея ў шматмесячным працэсе праймэрыз, у выніку якога, як правіла, становіцца канчаткова ясным, хто стане кандыдатамі ў прэзыдэнты ад дзьвюх галоўных партыяў краіны. Няўдалыя для Нікі Гэйлі вынікі практычна гарантуюць перамогу Дональда Трампа на рэспубліканскіх праймэрыз і намінацыю яго ў прэзыдэнты ад Рэспубліканскай партыі.

Камэнтуючы вынікі Супэраўторка, Дональд Трамп зьвярнуўся да рэспубліканцаў: «Мы павінны абʼяднацца, і гэта адбудзецца вельмі хутка».

Джо Байдэн зьвярнуўся да выбарнікаў з заклікам устаць на абарону дэмакратыі: «Для кожнага пакаленьня амэрыканцаў надыходзіць момант, калі неабходна ўстаць на абарону дэмакратыі. Устаць на абарону нашых асабістых свабодаў. Прыйшоў наш момант. Разам мы пераможам».

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG