Лінкі ўнівэрсальнага доступу

У Расеі заявілі пра небясьпеку для Цэнтральнай Азіі ад Ісламскай дзяржавы і няўрадавых арганізацый


Міністар абароны Расеі Сяргей Шайгу. Архіўнае фота
Міністар абароны Расеі Сяргей Шайгу. Архіўнае фота

Сяргей Шайгу заявіў, што на тле вайны ва Ўкраіне няўрадавыя арганізацыі значна нарасьцілі антырасейскую дзейнасьць, каб зьнізіць вайскова-тэхнічную, эканамічную і культурную супрацу рэгіёну з Расеяй.

Міністар абароны Расеі Сяргей Шайгу заявіў пра неабходнасьць узмацненьня ваеннай бясьпекі ў рэгіёне Цэнтральнай Азіі.

«Абстаноўка ў рэгіёне застаецца складанай. Найбольшая пагроза, як і раней, існуе з тэрыторыі Афганістану. Летась колькасьць баевікоў Ісламскай дзяржавы павялічылася на 15%. Іх асноўная мэта — распаўсюд радыкальнай ідэалёгіі і падрыўной дзейнасьці на паўднёвых межах АДКБ», — заявіў Сяргей Шайгу на пасяджэньні калегіі Міністэрства абароны Расеі.

Адначасова расейскі міністар абароны прагназуе павелічэньне на 20% вытворчасьці наркотыкаў і, адпаведна, наркатрафіку праз краіны Цэнтральнай Азіі.

«Апроч таго, у рэгіёне функцыянуюць больш за 100 вялікіх празаходніх няўрадавых арганізацый, якія маюць больш за 16 тысяч прадстаўнікоў і філіялаў. На тле спэцыяльнай ваеннай апэрацыі гэтыя няўрадавыя арганізацыі значна нарасьцілі антырасейскую дзейнасьць з мэтай зьнізіць вайскова-тэхнічную, эканамічную і культурную супрацу з Расейскай Фэдэрацыяй. Прымаем меры папераджальнага характару», — заявіў Сяргей Шайгу.

Міністар абароны Расеі паведаміў, што расейскія падразьдзелы возьмуць удзел у сямі вучэньнях на тэрыторыі Казахстану, Кіргізстану і Таджыкістану.

«Вынікам падрыхтоўкі войскаў стануць вучэньні Калектыўных сіл апэратыўнага рэагаваньня АДКБ „Узаемадзеньне-2024“, у якіх возьмуць удзел вайсковыя кантынгенты пяці дзяржаў», — сказаў Сяргей Шайгу. Цяпер фармальна ў склад АДКБ уваходзяць 6 дзяржаў. Армэнія «замарозіла» свой удзел, але не спыніла свайго сяброўства ў арганізацыі.

Сяргей Шайгу заявіў, што вайсковыя часткі Цэнтральнай вайсковай акругі атрымліваюць новую зброю, у тым ліку ракетныя комплексы «Іскандэр-М» і рэактыўныя сыстэмы залпавага агню «Тарнада-Г».

«Рэалізацыя заплянаваных мерапрыемстваў да канца году дазволіць павялічыць баявую магутнасьць войскаў і забясьпечыць ваенную бясьпеку на Цэнтральна-Азіяцкім стратэгічным кірунку», — заявіў міністар абароны Расеі.

Апошнія вайсковыя вучэньні АДКБ праходзілі ў кастрычніку 2023 году на тэрыторыі Кіргізстану. Армэнія ў гэтых вучэньнях ужо ня ўдзельнічала.

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG