2 студзеня ўкраінскія вайскоўцы зьбілі ўсе 35 бесьпілётнікаў і 72 з 99 расейскіх ракет, паведаміў галоўнакамандуючы Ўзброенымі сіламі Ўкраіны Валеры Залужны.
Паводле яго слоў, войскамі СПА зьбітыя 10 з 10 аэрабалістычных ракет Х-47М2 «Кінжал», 59 з 70 крылатых ракет Х-101/Х-555/Х-55, тры з трох крылатых ракет «Калібр».
Залужны адзначыў, што 2 студзеня расейскія войскі паўтарылі масавую атаку з авіяўдарамі рознага тыпу, як гэта было некалькі дзён таму, 29 сьнежня.
У Кіеве выбухі адбываліся ў 8 з 10 раёнаў.
«У прыватнасьці, у Галасееўскім раёне абломак ракеты ўпаў на адкрытую тэрыторыю парку. Выбухі на Абалоні», — заявіў мэр Кіева Віталь Клічко.
Пасьля Клічко дадаў, што ў Пячэрскім раёне па выкліку выехалі экстраныя службы.
Кіраўнік Кіеўскай гарадзкой вайсковай адміністрацыі Сяргей Папко ўдакладніў, што ў Пячэрскім раёне абломкі ўпалі на дах шматпавярховага дома, у Абалоні — на тэрыторыю складоў.
Пасьля стала вядома аб падзеньні аскепкаў на будынак у Сьвятошынскім раёне.
Клічко таксама паведаміў аб адсутнасьці энэргазабесьпячэньня часткі аб’ектаў і жылых дамоў у некалькіх раёнах гораду.
У выніку ракетнай атакі адбылося ўзгараньне ў шматпавярховіку ў Саломенскім раёне. На гэты момант вядома пра аднага загінулага, 27 атрымалі раненьні і траўмы.
Раней Паветраныя сілы Ўкраіны папярэджвалі аб вялікай колькасьці ракет у кірунку сталіцы.
Аб абстрэлах паведаміў кіраўнік Харкаўскай абласной вайсковай адміністрацыі Алег Сінягубаў.
«Акупанты нанесьлі ўдары па Харкаве», — напісаў ён і заклікаў жыхароў рэгіёну не выходзіць са сховішчаў да зняцця трывогі да адбою трывогі.
Паводле мэра Харкава Ігара Церахава, горад пад інтэнсіўным ракетным ударам — пашкоджаны дамы і іншая цывільная інфраструктура. 41 чалавек пацярпеў, адзін — загінуў.
Уначы 2 студзеня расейскае войска нанесла масавую атаку дронамі, падчас якой сілы супрацьпаветранай абароны Ўкраіны зьбілі ўсе 35 бесьпілётнікаў, паведамлялі ў ВПС.
Чарговую расейскую атаку на Ўкраіну пракамэнтаваў прэзыдэнт краіны Ўладзімір Зяленскі:
«Зараз працягваецца ліквідацыя наступстваў чарговага расейскага нападу. Задзейнічаны ўсе неабходныя службы. Больш за 500 ратавальнікаў ДСНС, камунальнікаў, энэргетыкаў, міліцыянтаў. Кіеў і вобласьць, Харкаў. На гэты момант вядома пра 92 параненых. Усе атрымліваюць дапамогу. На жаль, чатыры чалавекі загінулі. Мае спачуваньні родным і блізкім.
Ужо трэція суткі нашы байцы СПА робяць неймаверную працу. З 31 сьнежня расейскія нелюдзі выкарысталі ўжо каля 170 „шагедаў“ і дзясяткі рэактыўных снарадаў розных тыпаў. Абсалютная большасьць зь іх была накіравана на цывільныя аб’екты. Я дзякую ўсім партнэрам, якія дапамагаюць ва ўмацаваньні нашага паветранага шчыта. І відавочна, што гэта дапамагае ратаваць сотні жыцьцяў кожны дзень і кожную ноч, якія забраў бы расейскі тэрор, калі б не „Патрыёты“ і іншыя сыстэмы абароны.
Сёлета мы працягнем працаваць з усімі ў сьвеце, хто шануе жыцьцё, каб яшчэ больш умацаваць наш паветраны шчыт і прыцягнуць Расею да адказнасьці за тое, што яна зрабіла. Тэрарыстычная дзяржава павінна адчуваць наступствы таго, што яна робіць».
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе на просьбу груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах вобласьцяў. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, некаторыя яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам. Насуперак заявам Пуціна пра атакі выключна на вайсковыя аб’екты, расейцы пачалі бамбіць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фатаздымкаў, на якіх відаць сотні нябожчыкаў, ахвяраў масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага 2022 году Расея захапіла толькі адзін абласны цэнтар — Херсон. Горад быў акупаваны расейскімі войскамі ў першыя дні вайны фактычна без баёў. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый і ў Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якіх Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 17 лістапада 2024 году тагачасны прэзыдэнт ЗША Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- З прыходам да ўлады ў ЗША прэзыдэнта Дональда Трампа рэзка актывізавалася тэма магчымых мірных перамоваў. Улетку 2025 году Дональд Трамп правёў шэраг сустрэчаў, у тым ліку з Уладзімірам Зяленскім і Ўладзімірам Пуціным. Аднак дамовіцца пра мірнае пагадненьне ці прынамсі пра асабістую сустрэчу прэзыдэнтаў Украіны і Расеі не атрымалася. Агулам мірныя перамовы дагэтуль не далі істотных вынікаў.
- 1 чэрвеня 2025 году на Дзень расейскай авіяцыі Ўкраіна правяла маштабную апэрацыю «Павуціньне». Служба бясьпекі Ўкраіны зладзіла ўдары па авіябазах па ўсёй тэрыторыі Расеі, зьнішчыўшы дзясяткі расейскіх вайсковых самалётаў. Дакладна невядома, адкуль кіраваліся гэтыя дроны і ці выкарыстоўвалі яны штучны інтэлект для нацэльваньня на расейскія самалёты. Паводле ўкраінскага боку, дахі грузавікоў, дзе хаваліся дроны, адчынялі дыстанцыйна, каб дазволіць квадракоптэрам узьлятаць.
- З пачатку 2024 году па цяперашні час украінскія дроны пашкодзілі мноства расейскіх нафаперапрацоўчых заводаў, што прывяло да істотнага скарачэньня вытворчасьці нафтапрадуктаў у Расеі.
- Лінія фронту ва Украіне на працягу 2025 і на пачатку 2026 году заставалася адносна стабільнай. Пры гэтым расейскія войскі павольна прасоўваліся на асобных участках. З кастрычніка 2025 па сакавік 2026 году Расея захапіла каля 1833 км². На пачатку 2026 году ўкраінскія сілы правялі шэраг удалых контратак. У канцы красавіка 2026 году ўпершыню за доўгі час Ўкраіна адваявала больш тэрыторыі, чым страціла.
Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.