Пастанову Савета міністраў апублікавалі 27 сьнежня на Нацыянальным прававым інтэрнэт-партале. Яго асноўныя палажэньні набываюць моц праз тры дні і будуць дзейнічаць цягам трох месяцаў.
Ліцэнзаваць належыць вываз рэпчатай цыбулі і яблыкаў зь Беларусі як у краіны ЭАЭС, так і за межы саюзу, незалежна ад паходжаньня тавараў. Выключэньне зрабілі для транзытных перавозак, а таксама для вывазу ў рамках міжнароднай гуманітарнай дапамогі.
У пастанове ўказана, што ліцэнзію могуць ня даць, калі Мінсельгасхарч атрымае дакумэнты заяўніка і палічыць, што цыбулі ці яблыкаў, якія можна прадаваць, не хапае краіне ці пэўнаму рэгіёну Беларусі.
Цыбулі павінна быць ня менш за 80%, а яблыкаў ня менш за 30%.
Патрабаваньне аб ліцэнзаваньні будзе распаўсюджвацца і на тавары, зьмешчаныя пад мытныя працэдуры да набыцьця моцы гэтай пастановы і яшчэ фактычна ня вывезеныя з краіны.
