Хроніка перасьледу 11 сьнежня: ператрусы ў Магілёве, вырак дыякану баптысцкай царквы ў Горадні

У Горадні вынесьлі новы вырак верніку-пратэстанту

Суд аштрафаваў дыякана горадзенскай баптысцкай царквы Дзяніса Камягіна на 30 базавых велічыняў (1100 рублёў) за падабайку ў сацыяльных сетках, піша «Хрысціянская візія».

Дзяніс Камягін — бацька чацьвярых дзяцей, выкладчык у Горадзенскім мэдычным унівэрсытэце, дыякан царквы «Сьвятло міру» і зяць пастара Васіля Трубчыка, якога нядаўна таксама аштрафавалі.

Калі адбылося затрыманьне і паводле якога артыкулу судзілі дыякана, невядома.

ГЛЯДЗІЦЕ ТАКСАМА:

Хроніка перасьледу: затрыманьні на шклозаводзе «Нёман», чарговы ператрус у журналіста Зьмітра Лупача

Сілавікі два дні праводзілі ператрусы ў Магілёве

Сілавікі 5 і 6 сьнежня праводзілі ператрусы ў жыхароў Магілёва, піша тэлеграм-канал MAYDAY.TEAM.

Паводле інфармацыі праваабаронцаў, ператрусы маглі быць зьвязаныя з тым, што нядаўна КДБ прызнаў «экстрэмісцкімі фармаваньнямі» мэдыя з Магілёва: 6TV Bielarus, «Магілёў Мэдыя» і «Навіны Магілёўскага рэгіёну».

Паводле папярэдняй інфармацыі MAYDAY.TEAM, ператрусы прайшлі ў Барыса Вырвіча, Аляксандра Агеева, Аляксея Бацюкова, Ігара Шарухі, Пятра Мігурскага і Сяргея Антонава.

ГЛЯДЗІЦЕ ТАКСАМА:

Хроніка перасьледу 4 сьнежня: Жыхара Баранавічаў публічна судзілі ў каледжы за«абразу» Лукашэнкі, пастара Трубчыка аштрафавалі ў Горадні

ГЛЯДЗІЦЕ ТАКСАМА:

Затрымалі пратэстанцкага пастара ў Горадні