Лінкі ўнівэрсальнага доступу

У ЗША завялі другую крымінальную справу супраць сына Джо Байдэна


Гантэр Байдэн. Архіўнае фота
Гантэр Байдэн. Архіўнае фота

Белы дом пакуль не камэнтаваў гэтай інфармацыі.

Міністэрства юстыцыі ЗША выставіла новыя крымінальныя абвінавачаньні супраць Гантэра Байдэна, сына дзейнага амэрыканскага прэзыдэнта, па факце нявыплаты 1,4 мільёна даляраў падаткаў.

Гэта другая крымінальная справа супраць сына дзейнага амэрыканскага прэзыдэнта.

У апублікаваным абвінаваўчым акце 56 старонак. У ім пералічылі абвінавачаньні па дзевяці пунктах, у тым ліку няплата падаткаў, пазьбяганьне падаткаў, а таксама падача махлярскай падатковай дэклярацыі.

«Гантэр Байдэн удзельнічаў у чатырохгадовай схеме, у межах якой ён вырашыў не плаціць сама меней 1,4 мільёна даляраў фэдэральных падаткаў, якія ён завінаваціўся за 2016–2019 гады, і ўхіліцца ад налічэньня падаткаў за 2018 год, калі ён падаў ілжывыя дэклярацыі», — адзначаецца ў паведамленьні Офісу спэцыяльнага пракурора Дэвіда Вайса, які расьсьледуе справу Гантэра Байдэна з 2019 году.

Паводле дакумэнтаў абвінавачаньня, з 2016 да 2020 году Байдэн-малодшы атрымаў больш за 7 мільёнаў даляраў даходу ад замежных апэрацый, у тым ліку аплату за працу ў радзе дырэктараў украінскай газавай кампаніі Burisma і ўдзел у кітайскім інвэстыцыйным фондзе.

У дакумэнце адзначаецца, што сын прэзыдэнта «марнаваў мільёны даляраў на экстравагантны лад жыцьця, замест таго каб аплочваць свае падатковыя рахункі». Пракуроры сьцьвярджаюць, што Гантэр Байдэн траціў грошы на «наркотыкі, эскорт і сябровак, раскошныя гатэлі і арэнду нерухомасьці, шыкоўныя аўтамабілі, адзеньне і іншыя прадметы асабістага характару».

Гантэру Байдэну паводле гэтых абвінавачаньняў пагражае да 17 гадоў пазбаўленьня волі.

Гэта ўжо другая крымінальная справа пасьля таго, як у ліпені сарвалася дамова са сьледзтвам аб прызнаньні вінаватасьці.

Белы дом пакуль не камэнтаваў гэтай інфармацыі.

Прэзыдэнт Джо Байдэн 5 сьнежня заявіў аб сваім намеры балятавацца на другі прэзыдэнцкі тэрмін. Гэтае рашэньне ён патлумачыў удзелам у будучых выбарах папярэдняга прэзыдэнта ЗША Дональда Трампа, якога Джо Байдэн лічыць «пагрозай для краіны».

У сваю чаргу Дональд Трамп, які сутыкнуўся з крымінальнымі абвінавачаньнямі за свае спробы скасаваць вынікі выбараў 2020 году, таксама характарызуе Байдэна як небясьпечнага аўтакрата.

Супраць Трампа завялі ўжо чатыры крымінальныя справы. Ні ў адной зь іх віны Трамп не прызнае.

Зыходзячы з апошніх апытаньняў амэрыканцаў, Трамп — патэнцыйны пераможца праймэрыз Рэспубліканскай партыі. У гэтым выпадку ён будзе змагацца за пасаду прэзыдэнта ЗША зь верагодным кандыдатам ад Дэмакратычнай партыі Джо Байдэнам і некалькімі самавылучэнцамі.

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG