Лінкі ўнівэрсальнага доступу

Байдэн заявіў, што мог бы не ісьці на другі тэрмін, калі б у выбарах зноў ня ўдзельнічаў Трамп


Прэзыдэнт ЗША Джо Байдэн, лістапад 2023 году
Прэзыдэнт ЗША Джо Байдэн, лістапад 2023 году

Як кажа дзейны прэзыдэнт ЗША Джо Байдэн, ягоны папярэднік Дональд Трамп нясе пагрозу амэрыканскай дэмакратыі.

Прэзыдэнт Джо Байдэн заявіў у аўторак, што мог бы адмовіцца ад паўторнага вылучэньня, калі б у будучых выбарах ня ўдзельнічаў Дональд Трамп, дадаўшы, што рэспубліканец нясе пагрозу для краіны, піша «Голас Амэрыкі».

«Калі б Трамп не балятаваўся, я ня ўпэўнены, што вылучыў бы сваю кандыдатуру, — сказаў Байдэн на імпрэзе для збору сродкаў на сваю перадвыбарчую кампанію 2024 году, якая адбылася ў прадмесьці Бостану. — Мы ня можам дазволіць яму перамагчы».

Заўвагі Байдэна прагучалі на фоне заклапочанасьці нават адданых прыхільнікаў Дэмакратычнай партыі ўзростам прэзыдэнта. У мінулым месяцы яму споўніўся 81 год.

Дарадцы прэзыдэнта Байдэна лічаць, што Трамп бліжэйшымі тыднямі зацьвердзіць свой статус лідэра сярод прэтэндэнтаў на намінацыю рэспубліканскага кандыдата ў прэзыдэнты. Пра гэта гавораць два чалавекі з атачэньня Байдэна.

У перадвыбарнай кампаніі 2020 году Байдэн часта згадваў, што ягонае рашэньне балятавацца было часткова зьвязанае з тым, як тагачасны прэзыдэнт Трамп адрэагаваў на мітынг белых нацыяналістаў у Шарлотсьвіле ў 2017 годзе. Цяпер кампанія Байдэна зноў пазыцыянуе Трампа як пагрозу амэрыканскай дэмакратыі.

Трамп, які сутыкнуўся з крымінальнымі абвінавачаньнямі за свае спробы скасаваць вынікі выбараў 2020 году, сам характарызуе Байдэна як небясьпечнага аўтакрата.

Байдэн аб’явіў аб намеры балятавацца на другі тэрмін у красавіку, пасьля таго як прыйшоў да асабістага перакананьня, што ні віцэ-прэзыдэнтка Камала Гарыс, ні які-небудзь іншы кандыдат ад дэмакратаў ня змогуць перамагчы Трампа на агульнанацыянальных выбарах налета.

Байдэн ня раз згадваў Трампа падчас актыўнай кампаніі збору сродкаў, якая пачалася ў аўторак у Бостане і прадугледжвае як мінімум дзевяць імпрэзаў да канца месяца.

Апошнія апытаньні паказваюць, што лідэр рэспубліканцаў апярэджвае Байдэна ў гіпатэтычных супрацьстаяннях у ключавых штатах і на нацыянальным роўні.

«Я думаю, ніхто не сумняваецца ў тым, што наша дэмакратыя зноў пад пагрозай», — сказаў Байдэн раней у аўторак.

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG