Лінкі ўнівэрсальнага доступу

Кіраўнік Беларускага расьсьледніцкага цэнтру Станіслаў Івашкевіч атрымаў узнагароду ад Дзярждэпартамэнту ЗША


 Дзяржсакратар ЗША Энтані Блінкен уручае прэмію Станіславу Івашкевічу.
Дзяржсакратар ЗША Энтані Блінкен уручае прэмію Станіславу Івашкевічу.

Кіраўніку Беларускага расьсьледніцкага цэнтру (БРЦ) Станіславу Івашкевічу ўручылі ўзнагароду Anti-Corruption Champions Award (ACCA). Ёй заахвочваюць актывістаў і журналістаў за ўнёсак у барацьбу з карупцыяй.

Цырымонія ўзнагароджаньня прайшла 7 сьнежня ў Дзяржаўным дэпартамэнце ЗША ў Вашынгтоне. Дзяржсакратар ЗША Энтані Блінкен адзначыў, што прэмія Станіславу Івашкевічу ўручаецца «за ягоную непахісную адданасьць барацьбе з карупцыяй і ўзмацненьню ўзьдзеяньня санкцый супраць Расеі і Беларусі».

«Як часта бывае, на ўзнагароджаньні — імя толькі аднаго з нас. Але гэтае прызнаньне заслугаў абсалютна кожнага [сябра каманды БРЦ]. Мы працуем не дзеля ўзнагарод, але гэта добрая інфападстава прыгадаць, што, робячы сваю справу дзень за днём, кожны з нас на сваім месцы ў БРЦ мяняе сьвет», — сказаў пасьля цырымоніі Станіслаў Івашкевіч.

Сёлета Беларускі расьсьледніцкі цэнтар выпусьціў каля двух дзясяткаў расьсьледаваньняў, дзе раскрыў карупцыйныя схемы, шляхі абыходу санкцый ЭЗ і ЗША, на якіх зарабляе сям’я Аляксандра Лукашэнкі і набліжаныя да яе. За 2023 год БРЦ раскрыў схемаў больш як на $3 млрд.

Сярод іншага, БРЦ высветліў, што:

  • Самы буйны «нафтавы кашалёк» Лукашэнкі Анатоль Тарнаўскі пазьбягае згадкі свайго імя нават у дакумэнтах уласных кампаній, што дапамагае яму гадамі сыходзіць ад санкцый;
  • Аляксандр Лукашэнка і людзі зь ягонага атачэньня спрыяюць вывазу дзяцей з акупаваных тэрыторый Украіны — спачатку яны трапляюць у Раею, пасля некаторыя апынаюцца ў Беларусі;
  • Другую хвалю міграцыйнага крызісу на мяжы Беларусі ЭЗ справакавала Расея, а на мігрантах зараблялі турфірмы пры падтрымцы беларускіх сілавікоў;
  • Некаторыя прыватныя і дзяржаўныя прадпрыемствы, нягледзячы на санкцыі Эўразьвязу, працягваюць прадаваць беларускую драўніну ў Эўразьвяз. Дапамагае Беларусі абыходзіць эмбарга Казахстан і Кыргызстан;
  • Лукашэнка «контрсанкцыйным» указам стварыў на рынку Беларусі штучны дэфіцыт прадуктаў з ЭЗ. Ягоны сябра, бізнэсовец Сяргей Цяцерын увозіць некаторы імпарт у абыход санкцыяў і прадае беларусам па больш высокіх цэнах.
  • У тым ліку дзякуючы расьсьледаваньням БРЦ 5 сьнежня Міністэрства фінансаў ЗША ўнесла ў санкцыйны сьпіс уладальніка «Амкадора», бізнэсмэна Аляксандра Шакуціна.

  • ACCA заснаваў дзяржсакратар ЗША Энтані Блінкен у лютым 2021 году. Сёлета ўзнагароду атрымалі 11 ляўрэатаў, у тым ліку зь Індыі, Кыргызстану і Чарнагорыі. За ўвесь час існаваньня ACCA ёй адзначылі 43 чалавекі.

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG