Каля траціны абвінавачаных апраўдалі. Астатніх суд прыгаварыў агулам да больш як да 2200 гадоў турэмнага зьняволеньня. Адно толькі абвяшчэньне выраку доўжылася больш за паўтары гадзіны, піша The Guardian.
Сярод асуджаных — як мінімум двое высокапастаўленых членаў мафіёзнай групоўкі. Кожны атрымаў па 30 гадоў турмы. 11 гадоў правядзе за кратамі і іх саўдзельнік, 70-гадовы былы адвакат Джанкарлё Пітэлі.
- «Ндрангета» (калябрыйская мафія, паходжаньне назвы цьмянае. Адна з этымалёгіяў выводзіць яе ажно з старажытнагрэцкага ἀνδραγαθἰα «адвага», — РС) — лічыцца адным з самых магутных злачынных сындыкатаў у сьвеце, яна распаўсюджвае свой уплыў на Паўночную Эўропу, Паўднёвую Амэрыку і ЗША і валодае амаль поўнай манаполіяй на імпарт какаіну ў Эўропу. Яе штогадовыя даходы вылічаюцца дзясяткамі мільярдаў эўра.
- Цэнтрам мафіёзнай групоўкі быў невялікі горад Віба-Валентыя, які кантраляваў клан Манкуза. Аднак сам Люіджы Манкуза ў лік абвінавачаных на гэтым працэсе ня трапіў. Яго будуць судзіць асобна.
Пры гэтым галоўным сьведкам на працэсе быў яго пляменьнік Эмануэле Манкуза. Менавіта ён раскрыў сакрэты клану ў абмен на абарону паліцыі.
Расьсьледаваньне пачалося яшчэ ў 2016 годзе і пашырылася як мінімум на 11 рэгіёнаў Італіі. Усяго ў ім было задзейнічана звыш 2500 афіцэраў паліцыі.
Пошукамі верхаводаў займалася элітнае падразьдзяленьне італьянскай паліцыі — верталётная эскадрыльля карабінэраў «Паляўнічыя Сыцыліі».
Сярод арыштаваных, абвінавачаных і асуджаных былі ня толькі непасрэдныя чальцы мафіёзнай групоўкі, але і палітыкі, якія супрацоўнічалі зь імі.
Некаторых зь іх арыштавалі ў Нямеччыне, Швайцарыі і нават Баўгарыі.
Суду былі прадстаўлены шматлікія сьведчаньні вымаганьняў, карупцыі пры заключэньні дзяржаўных кантрактаў, незаконнага захоўваньня зброі, маніпуляцыі вынікамі мясцовых выбараў і хабарніцтва.
