Пра гэта паведамляе выданьне The Village.
Кніга называецца Bad Day in Minsk і расказвае пра прыгоды Тома Ўінскомба. У кнізе і выкраданьні, і забойствы, і самагон, і нечаканыя павароты.
У Тома Ўінскомба сёньня дрэнны дзень. Апынуўшыся ў пастцы на вяршыні самага высокага хмарачоса ў Менску, пакуль проста пад ім некалькі мафіёзных груповак ладзяць сьмяротныя разборкі, ён разважае пра пасьлядоўнасьць падзеяў, якія прывялі яго сюды. Спачатку — няўдалы рэйд на сакрэтны камандны пункт, затым — цэнтар Чарнобыльскай зоны адчужэньня. Але цяпер больш важна, як выбрацца з палаючага хмарачоса жывым, бо адзіны чалавек, які можа дапамагчы, не размаўляе зь ім.
Новы дэтэктыў — чацьвёрты ў сэрыі «Матэматычныя загадкі» ад выдавецтва Farrago. У другой кнізе сэрыі («Праўда пра Арчы і Пі» — гэта пра Архімэда і Піфагора) таксама згадвалася беларуская мафія.
Вобраз Беларусі як змрочнага закутка сьвету, дзе ёсьць раздольле мафіі, кілерам і бандытам, апошнім часам нярэдка выкарыстоўваецца і ў заходнім кінэматографе.