Як паведамілі ў МЗС Беларусі, выхад беларускіх грамадзян і іх сямейнікаў з сэктару Газа арганізавалі з дапамогай Ізраілю і Эгіпту, пры садзейнічаньні Катару і Расеі.
«Да цяперашняга часу 43 чалавекі прайшлі праз памежны пераход „Рафах“ на тэрыторыю Эгіпту. Бліжэйшым часам чакаецца іх вяртаньне на Радзіму», — заявілі ў Міністэрстве замежных спраў Беларусі.
Раней дарадца міністра ў надзвычайных сытуацыях РФ Данііл Мартынаў паведаміў «Комсомольской правде», што 15 лістапада з сэктару Газа могуць выпусьціць 48 грамадзян Беларусі.
Данііл Мартынаў — кіраўнік групы, якая рушыла на кантрольна-прапускны пункт «Рафах» на мяжы Эгіпту з сэктарам Газа, каб вывезьці грамадзян РФ. «Цяпер разам з намі ў калёне едуць дыпляматы зь Беларусі. Гэта значыць, мы сёньня забіраем сваіх, а яны будуць выцягваць сваіх», — сказаў ён.
«У нас ужо мэханізм адпрацаваны, мы ім падкажам, як правільней усё зрабіць, каб гэта было апэратыўна. І потым мы выяжджаем адной калёнай разам зь беларусамі. Яны едуць у наш гатэль, дзе ў мяне знаходзіцца апэратыўны штаб. Там мы ім аказваем дапамогу сіламі нашых адмыслоўцаў», — дадаў расейскі чыноўнік.
Паводле Мартынава, калі беларусы прыедуць, іх будуць «прапускаць» праз расейскіх спэцыялістаў, аказваць ім мэдычную і псыхалягічную дапамогу і іншыя паслугі, якія аказваюцца і расейскім грамадзянам. Іх разьмесьцяць у адным гатэлі з грамадзянамі РФ і пасьля расейскімі бартамі МНС будуць перапраўляць у Маскву.
- Толькі празь месяц пасьля пачатку вайны ўлады Беларусі арганізавалі гуманітарны рэйс для беларусаў, якія жадаюць пакінуць тэрыторыю Ізраілю. Да гэтага беларускія чыноўнікі называлі розныя прычыны, чаму эвакуацыя ня можа адбыцца. Аднак, як паведаміла амбасада Беларусі ў Ізраілі, рэйс выконваецца на камэрцыйнай аснове, кошт квітка — 550 даляраў.
- 6 лістапада эвакуацыйны рэйс авіякампаніі «Белавія» забраў 117 беларусаў з Тэль-Авіва ў Менск.
Вайна Ізраілю з ХАМАСам. Асноўнае
- 7 кастрычніка 2023 году Ізраіль зазнаў ракетнага ўдару з боку сэктару Газа, а баевікі руху ХАМАС прарваліся на тэрыторыю краіны, забіўшы ня меней за 260 удзельнікаў музычнага фэсту і захапіўшы сотні закладнікаў. Некаторых людзей расстрэльвалі проста на вуліцах.
- Уварваньне з сэктару Газа адбылося ў 50-ю гадавіну пачатку вайны Суднага дня 1973 году.
- Армія абароны Ізраілю (ЦАХАЛ) у адказ на атаку пачала ваенную апэрацыю «Жалезныя мячы». Ужо 8 кастрычніка Ізраіль афіцыйна абвясьціў стан вайны.
- ХАМАС папярэдзіў, што будзе забіваць аднаго з закладнікаў кожны раз, калі ізраільскія вайскоўцы будуць бамбіць цывільныя аб’екты ў Газе.
- Іран заявіў, што не бярэ ўдзелу ў вайне, але адкрыта заявіў пра падтрымку дзеяньняў ХАМАСу. Найвышэйшы ўладар Ірану аятала Алі Хамэнэі заявіў: «Мы цалуем рукі тым, хто плянаваў напад на сыянісцкі рэжым».
- Колькасьць параненых беларусаў на 10 кастрычніка 2023 году — 3 чалавекі. Стан адной з параненых жанчын цяжкі.
- 10 кастрычніка ў кібуцы Кфар Аза побач з сэктарам Газа выявілі целы дзясяткаў забітых, у тым ліку малых дзяцей.
- Міністар абароны Ізраілю Яаў Галант 11 кастрычніка заявіў, што войска пераходзіць да поўнамаштабнага наступу на сэктар Газа.
- Лібанская ўзброеная групоўка «Хезбала» 11 кастрычніка абстраляла супрацьтанкавымі ракетамі пазыцыі ізраільскіх вайскоўцаў і заявіла, што забіла і параніла іх.
- Па стане на 17 кастрычніка вядома, што ў Ізраілі з пачатку вайны загінулі трое грамадзян Беларусі.
- Ізраіль у лістападзе 2023 году пайшоў у атаку на сэктар Газа і заявіў аб пашырэньні наземнай апэрацыі.
- 22 лістапада стала вядома, што Ізраіль і ХАМАС у Катары падпісалі пагадненьне ад замірэньні на 4 дні. Пазьней замірэньне падоўжылі, але ўжо 30 лістапада яно спынілася пасьля ракет з Газы па Ізраілі, заявілі ў ЦАХАЛ.
- За час замірэньня з палону ХАМАС было вызвалена 105 закладнікаў, а з ізраільскіх турмаў 240 палестынскіх зьняволеных.
- 6 студзеня Ізраіль заявіў пра тое, што поўнач Газы зачышчаная ад баевікоў ХАМАС.
«Хэзбала» выпусьціла ракеты па Ізраілі на наступны дзень пасьля нападу ХАМАС, у кастрычніку 2023 году. З таго часу абстрэлы на мяжы адбываюцца амаль штодня. Дзясяткі тысяч жыхароў эвакуавалі з прымежных раёнаў з абодвух бакоў.
«Хэзбала» — ваенізаваная групоўка і палітычная партыя, якая кантралюе значную частку паўднёвага Лібану. Злучаныя Штаты лічаць яе тэрарыстычнай арганізацыяй. Эўрапейскі Зьвяз унёс у свой сьпіс такіх арганізацыяў толькі яе ўзброенае крыло, але не палітычную партыю (партыя «Хэзбалы» прадстаўлена ў парлямэнце Лібану). «Хэзбала» таксама ёсьць часткаю так званай іранскай «восі супраціву» — сеткі іранскіх давераных асобаў і падтрыманых Тэгеранам групаў баевікоў, якія выступаюць супраць Ізраілю і ЗША. - Увосень 2024 году рэзка вырасла супрацьстаяньне на ізраільска-лібанскай мяжы. «Хэзбала» атакавала Ізраіль, а ў Тэль-Авіве вырашылі правесьці сэрыю авіяналётаў, каб зьнішчыць атакавальны патэнцыял «Хэзбалы».
- 23 верасьня Ізраіль распачаў першую з 2006 году наземную апэрацыю на поўдні Лібану, калі пачалася Другая лібанская вайна (Ліпеньская вайна). Апэрацыю назвалі «Стрэлы поўначы».
- 27 верасьня Ізраіль нанёс магутныя ўдары па Лібане і забіў лідэра «Хэзбалы» Хасана Насралу.
- 3 кастрычніка Армія абароны Ізраілю паведаміла пра атаку на аб’екты «Хэзбалы» ў Бэйруце.
Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
