Аляксандар Лукашэнка 10 лістапада падпісаў указы №350 і №351, якія ўносяць зьмены ў дзейнасьць ягонага фонду па падтрымцы культуры і мастацтва і рэгулююць падыходы да заахвочваньняў спэцыяльнымі прэміямі дзеячаў культуры і мастацтва, а таксама спартоўцаў, паведамляе ягоная прэс-служба.
У падставы для ўручэньня прэміі «За духоўнае адраджэньне» ўключылі дзейнасьць па патрыятычным выхаваньні моладзі і рэалізацыі дабрачынных праектаў. Таксама дапоўнілі віды мастацтваў, у якіх будуць прысуджаць спэцыяльную прэмію.
Значна павялічылі памер прэміі «Беларускі спартовы Алімп» — да 350 базавых велічынь (цяпер гэта 12 950 беларускіх рублёў). Гэтую прэмію цяпер змогуць прысуджаць і «калектывам работнікаў арганізацый, якія зрабілі значны ўнёсак у разьвіцьцё фізычнай культуры і спорту».
Таксама ўказам вызначаны парадак пазбаўленьня спэцыяльных прэмій дзеячаў культуры і мастацтва, прэмій «За духоўнае адраджэньне» і «Беларускі спартыўны Алімп» і аднаўленьня ў правах іх ляўрэатаў. За што дзеячаў культуры цяпер могуць пазбавіць прэміі, не ўдакладняецца.
Фонд Лукашэнкі па падтрымцы культуры і мастацтва цяпер будзе таксама падтрымліваць «праекты па патрыятычным выхаваньні насельніцтва, захаваньні нацыянальных духоўных традыцый, вяртаньні культурных каштоўнасьцяў», а таксама сацыяльныя праекты і ініцыятывы для дзяцей-сірот, інвалідаў, старых і інш.
- Апошнім часам рэжым Лукашэнкі актыўна ўзяўся за «патрыятычнае выхаваньне» дзяцей: у школах увялі пасаду адмысловага вайскова-патрыятычнага выхавальніка, для дзяцей ствараюць вайскова-патрыятычныя клюбы. Да канца гэтага навучальнага году вайскова-патрыятычную клясу ці клюб плянуюць адкрыць у кожнай школе Беларусі.
- Дашкольныя навучальныя ўстановы таксама актыўна займаюцца «патрыятычным выхаваньнем» дзяцей: праводзяць сустрэчы дзяцей з праваслаўнымі сьвятарамі і водзяць іх у цэрквы, ладзяць «патрыятычныя мерапрыемствы», у тым ліку з удзелам БРСМ, міліцыі, АМАПу, пракурорскіх работнікаў і вайскоўцаў.
