Эўрапейскі суд у Люксэмбургу 8 лістапада адмовіўся зьняць санкцыі з праўладных беларускіх бізнэсоўцаў Мікалая Вараб’я і Аляксандра Зайцава, а таксама кампаніі «Брэміна-Груп», якая ім належыць, заўважыла выданьне «Позірк».
У рашэньні суду адзначаецца, што Мікалай Варабей — «адзін зь вядучых бізнэсоўцаў, якія працуюць у Беларусі, зь бізнэс-інтарэсамі ў нафтавай, транзытнай, вугальнай, банкаўскай і іншых галінах», ён саўладальнік «Брэміна-Груп» — «кампаніі, якая карысталася падатковымі льготамі і іншымі формамі падтрымкі з боку беларускіх уладаў».
Такім чынам, на думку суду, Варабей «атрымлівае выгаду і падтрымлівае [рэжым Лукашэнкі]».
Асобна быў разгледжаны пазоў бізнэсоўца Аляксандра Зайцава. Суд адзначыў, што Зайцаў — былы памочнік Віктара Лукашэнкі, сына Аляксандра Лукашэнкі, і дзякуючы доступу да сям’і Лукашэнкі «атрымлівае выгадныя кантракты для сваіх эканамічных прадпрыемстваў».
У рашэньні суду падкрэсьліваецца, што «Брэміна-Груп» «зьяўляецца ініцыятарам і сумэнэджарам праекту асаблівай эканамічнай зоны «Брэміна-Ворша», створанай указам Лукашэнкі. Кампанія «атрымала дзяржаўную падтрымку, а таксама шэраг фінансавых, падатковых і іншых ільготаў», гаворыцца ў рашэньні суду.
«Уладальнікі „Брэміна-Воршы“ Аляксандар Зайцаў, Мікалай Варабей і Аляксей Алексін належаць да блізкага кола бізнэсоўцаў, зьвязаных з Лукашэнкам, і падтрымліваюць шчыльныя сувязі зь ім і ягонай сям’ёй», — адзначаецца ў справе Зайцава.
Суд зрабіў выснову, што бізнэсоўцы і «Брэміна-Груп» здабываюць выгаду з супрацоўніцтва з рэжымам Лукашэнкі.
У сувязі з гэтым Вараб’ю і Зайцаву адмоўлена ў задавальненьні пазоваў. Іх абавязалі аплаціць судовыя выдаткі.
Эўразьвяз увёў санкцыі супраць Мікалая Вараб’я ў сьнежні 2020 году, супраць Аляксандра Зайцава — у чэрвені 2021 году.
Пасьля сьнежаньскіх санкцыяў 2020 году Мікалай Варабей, як і іншыя паплечнікі Лукашэнкі, вырашыў вывесьці свае актывы з-пад санкцыйнага ціску, проста перапісаўшы іх на іншых асобаў. Так, у канцы 2020 году Верабей перапісаў свой базавы актыў — «Чырвоны Бор» — на Алесю Беражную, Вячаслава Атрахімовіча ды Ірыну Панкратаву.
Беражная і Атрахімовіч — топ-мэнэджары алігарха, займалі тады пасады дырэктаркі і галоўнага бухгальтара кампаніі «Інтэрсэрвіс». Панкратава на пачатку 2010-х была індывідуальнай прадпрымальніцай у Наваполацку.
Аднак схема зь перапісваньнем актываў перастала працаваць летам 2021 году, калі Эўразьвяз і ЗША пачалі ўводзіць санкцыі супраць канкрэтных кампаніяў Вараб’я. Праз два гады банк паплечніка Лукашэнкі фактычна перастаў існаваць.
