У чэрвені 2023 году pressball.by быў заблякаваны Міністэрствам інфармацыі без паведамленьня рэдакцыі аб прычынах. На пачатку жніўня супрацоўнікі адкрылі сайт resport.by, аднак і ён менш як праз суткі быў заблякаваны.
6 кастрычніка адзіным уласьнікам спартовага выданьня стала Асацыяцыя «Беларуская фэдэрацыя футболу» (БФФ). Адпаведнае рашэньне было зацьверджанае на пасяджэньні выканкаму арганізацыі.
Фэдэрацыя набыла 50% долі ў статутным фондзе ТАА «Прэсбол-91»: па 10% — у Дзьмітрыя Беленькага (пакінуў газэту «Прессбол» каля трох гадоў таму) і Аляксандра Дабрыяна, яшчэ 30% — у Юрыя Арлова (дзеючыя супрацоўнікі).
З улікам таго, што БФФ ужо валодала паловай долі статутнага фонду ТАА «Прэсбол-91», яна стала адзіным яго ўладальнікам.
Продаж фэдэрацыі 50% долі ў статутным фондзе выданьня адбыўся на фоне фінансавых праблемаў, зь якімі мэдыя сутыкнулася пасьля блякаваньня сайту і страты рэклямных даходаў.
11 жніўня на 55‑м годзе жыцьця памёр галоўны рэдактар «Прессбола» Сяргей Лісічкін. Новы галоўны рэдактар дагэтуль не прызначаны.
Газэта «Прессбол» выходзіць са студзеня 1991 году.
Змаганьне ўлады супраць недзяржаўных СМІ
Пасьля сфальшаваных прэзыдэнцкіх выбараў 2020 году і сілавога здушэньня агульнанацыянальных пратэстаў аўтарытарны рэжым Аляксандра Лукашэнкі пачаў сыстэматычна выкарыстоўваць антыэкстрэмісцкае заканадаўства для барацьбы з іншадумствам, ліквідацыі незалежных мэдыя і перасьледу палітычных апанэнтаў.
Улады заблякавалі сайты незалежных мэдыя і спынілі публікацыю непадкантрольных друкаваных выданьняў, пазбавілі акрэдытацыі журналістаў іншаземных мэдыя і разграмілі офісы самых уплывовых СМІ. Сотні беларускіх рэпартэраў прайшлі праз арышты, дзясяткі застаюцца ў турмах. Усе незалежныя мэдыя, якія асьвятляюць грамадзка-палітычны парадак дня ў Беларусі, цяпер працуюць выключна з-за мяжы.
Ад 2021 году ўлады пачалі масава абвяшчаць вэб-сайты і асобныя ўліковыя запісы ў сацыяльных сетках незалежных мэдыя, палітычных і грамадзкіх арганізацый, ініцыятыў і проста блогераў «экстрэмісцкімі матэрыяламі», а іх аўтараў «экстрэмісцкімі фармаваньнямі» — часта без судовага разгляду.
Рэспубліканскі сьпіс экстрэмісцкіх матэрыялаў вядзе Міністэрства інфармацыі Беларусі. На дадзены момант у сьпісе на 1469 старонках пералічаны тысячы «экстрэмісцкіх матэрыялаў», за выкарыстаньне якіх прадугледжаная адказнасьць. У сьпісе — сайты, тэлеграм-каналы, акаўнты, старонкі ў сацыяльных сетках, відэаролікі і артыкулы ў інтэрнэце, маркі, значкі, CD-дыскі, а таксама кнігі, у тым ліку мастацкія.
На канец 2024 году больш за 6500 онлайн-рэсурсаў былі забароненыя такім чынам. За любое ангажаваньне з уключанымі ў экстрэмісцкі сьпіс рэсурсамі — ці гэта «падабайка», ці камэнтар, ці падпіска на канал — у Беларусі пагражае крымінальная адказнасьць. Удзел у «экстрэмісцкім фармаваньні» можа карацца турэмным зьняволеньнем да 10 гадоў.
Ужо тысячы беларусаў прайшлі праз штрафы, арышты і турэмнае зьняволеньне за «экстрэмізм».
Паводле ацэнкі Ўпраўленьня Вярхоўнага камісара ААН у правах чалавека, улады Беларусі «выкарыстоўваюць ярлык „экстрэмізм“ для падаўленьня іншадумства, адвольна клясыфікуючы дзеяньні, апісаныя як распаўсюд ілжывай інфармацыі, абразу службовых асобаў, дыскрэдытацыю інстытутаў, арганізацыю масавых беспарадкаў, заклікі да санкцый і распальваньне сацыяльнай варожасьці, як „экстрэмісцкія“, якія падлягаюць крымінальнаму перасьледу».
