Пяць расейскіх пасажырскіх самалётаў 12 кастрычніка падалі сыгналы бедзтва, але ніводзін зь іх не зьмяніў курсу або вышыні.
Як паведаміла расейскае дзяржаўнае інфармацыйнае агенцтва ТАСС, усе самалёты прадоўжылі палёт у заплянаваныя пункты прызначэньня і прызямліліся ў штатным рэжыме.
Пазьней удакладнілі, што сыгналы бедзтва сталі вынікам збояў у электроннай сыстэме адсочваньня самалётаў.
У канцы лютага 2022 году, пасьля пачатку вайны Расеі супраць Украіны, абмежаваньні на палёты расейскіх авіякампаній увялі ЗША, Эўразьвяз і іншыя краіны.
ЭЗ забараніў экспарт у Расею тавараў і тэхналёгій, якія выкарыстоўваюцца ў авіяцыйным і касьмічным сэктарах, а таксама забараніў страхаваньне і тэхнічнае абслугоўваньне тавараў, зьвязаных з гэтымі галінамі.
Сёлета другая па памеры расейская авіякампанія S7 скароціць асеньне-зімовы расклад на 10–15% адносна мінулага году з прычыны праблем з рамонтам амэрыканскіх рухавікоў, усталяваных на самалётах Airbus A320/А321neo.
Расейскія авіякампаніі навучыліся абыходзіць санкцыі пры ўвозе запчастак, але рухавікі новага пакаленьня «чыпаваныя», іх перамяшчэньне кантралюецца. Аднак абслугоўваць рухавікі гэтых самалётаў без афіцыйнай падтрымкі і абнаўленьня праграмнага забесьпячэньня немагчыма, як і ўвозіць іх па шэрых схемах, адзначаюць экспэрты.
