Zerkalo.io паспрабавала высьветліць у Валерыя Сахашчыка падрабязнасьці.
Па словах Сахашчыка, 1-я асобная дэсантна-штурмавая рота ўваходзіць у склад адной з дэсантна-штурмавых брыгад Узброеных сіл Украіны (у якую менавіта, ён не паведаміў).
Рота, па словах прадстаўніка Кабінэту, складаецца з вайскоўцаў-прафэсіяналаў, у першую чаргу людзей, якія маюць баявы досьвед і афіцэрскія званьні.
Як правіла, колькасьць роты вар’іруе ў прамежку ад 30 да 120 чалавек. Колькі людзей у новым беларускім падразьдзяленьні Сахашчык пакуль ня кажа.
— За колькасьцю мы ня гналіся і ня будзем гнацца. У той справе, якую робім мы, галоўным зьяўляецца ўзровень кваліфікацыі, тэхнічнага абсталяваньня, і ўжо потым усё астатняе. Акрамя таго, падобныя дэталі не выдаюцца з прычын, зьвязаных зь бясьпекай, — заявіў ён.
Сахашчык дадаў, што цяпер асобная штурмавая рота знаходзіцца на Данецкім напрамку і становіць рэзэрву камандзіра адной з асобных штурмавых брыгад.
— Мы выконваем задачы там, дзе цяжэй за ўсё, на тых участках, дзе ёсьць нейкія праблемы. Нас накіроўваюць для аказаньня дапамогі падразьдзяленьням, якія аказаліся ў цяжкім становішчы. Магу вам сказаць, што ўкраінскія дэсантнікі высока ацэньваюць нашу прысутнасьць і падтрымку, асабліва ў начны час. Прыбыцьцё нават невялікай групы зь некалькіх нашых хлопцаў у апорны пункт роты часта кардынальна мяняе карціну бою і павышае шанцы на пасьпяховае выкананьне любой баявой задачы дзякуючы тэхнічнаму аснашчэньню і ўзроўню падрыхтоўкі.
Прадстаўнік Кабінэта паабяцаў, што ў хуткім часе грамадзкасьць зможа больш даведацца пра людзей, якія ваююць у яго роце.
— Мы вытрымлівалі рэжым маўчаньня і пачынаем адыходзіць ад яго.
Сахашчык таксама расказаў, што яму ўжо пачынае паступаць інфармацыя пра рэакцыю беларускіх вайскоўцаў на ягоны заклік, у якім ён нагадаў ім пра вайсковую прысягу:
— Я валодаю інфармацыяй, што многімі людзьмі гэта ўспрынята станоўча. Ад самага пачатку я выказваў думку, і застаюся пры ёй, што мы павінны вырашыць праблему ў Беларусі без грамадзянскай вайны, без вызваленчых паходаў якога б там ні было войска і без кровапраліцьця, прынамсі вялікага. Я ўпэўнены, што гэта рэальна і што мы гэта зробім. Мы рухаемся па гэтым шляху, і я ўпэўнены, што ў нас будзе станоўчы вынік.
- Раней у сваім тэлеграм-канале Валер Сахашчык апублікаваў фота роты, створанай зь беларускіх добраахвотнікаў. Пра яе зьяўленьне стала вядома 9 чэрвеня, яна ўваходзіць у склад дэсантна-штурмавых войскаў Украіны.
- «Наша падразьдзяленьне ўжо другі месяц выконвае баявыя задачы на адным з самых цяжкіх участкаў фронту на паўднёвым усходзе Ўкраіны і атрымлівае баявы вопыт, неабходны для стварэньня новага, высокатэхналягічнага і высокаэфэктыўнага беларускага войска», — расказаў Сахашчык.
- Пасьля ён зьвярнуўся да беларускіх сілавікоў, папрасіўшы іх памятаць пра прысягу, якую яны давалі народу, і выконваць свой воінскі абавязак, «каб гарантаваць бясьпеку нашага народу, абараняць яго ад ворагаў, якія праліваюць кроў беларусаў і пазбаўляюць іх свабоды».
- Таксама Валер Сахашчык зьвярнуўся да расейскіх вайскоўцаў, якія цяпер знаходзяцца на тэрыторыі Беларусі. Ён падкрэсьліў, што дамоўленасьці Лукашэнкі з Пуціным «ня вартыя нават той паперы, на якой яны напісаныя», і іх «ніхто ня клікаў» у Беларусь, таму тут яны «такія ж акупанты, як і іх суайчыньнікі ва Ўкраіне».
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе на просьбу груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах вобласьцяў. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, некаторыя яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам. Насуперак заявам Пуціна пра атакі выключна на вайсковыя аб’екты, расейцы пачалі бамбіць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фатаздымкаў, на якіх відаць сотні нябожчыкаў, ахвяраў масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага 2022 году Расея захапіла толькі адзін абласны цэнтар — Херсон. Горад быў акупаваны расейскімі войскамі ў першыя дні вайны фактычна без баёў. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый і ў Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якіх Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 17 лістапада 2024 году тагачасны прэзыдэнт ЗША Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- З прыходам да ўлады ў ЗША прэзыдэнта Дональда Трампа рэзка актывізавалася тэма магчымых мірных перамоваў. Улетку 2025 году Дональд Трамп правёў шэраг сустрэчаў, у тым ліку з Уладзімірам Зяленскім і Ўладзімірам Пуціным. Аднак дамовіцца пра мірнае пагадненьне ці прынамсі пра асабістую сустрэчу прэзыдэнтаў Украіны і Расеі не атрымалася. Агулам мірныя перамовы дагэтуль не далі істотных вынікаў.
- 1 чэрвеня 2025 году на Дзень расейскай авіяцыі Ўкраіна правяла маштабную апэрацыю «Павуціньне». Служба бясьпекі Ўкраіны зладзіла ўдары па авіябазах па ўсёй тэрыторыі Расеі, зьнішчыўшы дзясяткі расейскіх вайсковых самалётаў. Дакладна невядома, адкуль кіраваліся гэтыя дроны і ці выкарыстоўвалі яны штучны інтэлект для нацэльваньня на расейскія самалёты. Паводле ўкраінскага боку, дахі грузавікоў, дзе хаваліся дроны, адчынялі дыстанцыйна, каб дазволіць квадракоптэрам узьлятаць.
- З пачатку 2024 году па цяперашні час украінскія дроны пашкодзілі мноства расейскіх нафаперапрацоўчых заводаў, што прывяло да істотнага скарачэньня вытворчасьці нафтапрадуктаў у Расеі.
- Лінія фронту ва Украіне на працягу 2025 і на пачатку 2026 году заставалася адносна стабільнай. Пры гэтым расейскія войскі павольна прасоўваліся на асобных участках. З кастрычніка 2025 па сакавік 2026 году Расея захапіла каля 1833 км². На пачатку 2026 году ўкраінскія сілы правялі шэраг удалых контратак. У канцы красавіка 2026 году ўпершыню за доўгі час Ўкраіна адваявала больш тэрыторыі, чым страціла.
Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.