Прэм’ер-міністар Армэніі Нікол Пашыньян заявіў аб гатоўнасьці прызнаць 86,6 тысячы квадратных кілямэтраў, уключаючы Нагорны Карабах, тэрыторыяй Азэрбайджану.
«86 600 квадратных кілямэтраў таксама ўключае і Нагорны Карабах. Але варта адзначыць, што мы гаворым пра тое, што пытаньне армянаў Нагорнага Карабаху і іхных правоў і бясьпекі павінна абмяркоўвацца ў фармаце Баку — Стэпанакерт», — цытуе армянскае інфармацыйнае агенцтва «Армэнпрэс» словы Нікола Пашыньяна.
Прэм’ер Армэніі дадаў, што і Азэрбайджан у сваю чаргу гатовы прызнаць тэрыторыяй Армэніі 29,8 тысячы квадратных кілямэтраў.
Нікол Пашыньян таксама заявіў, што пытаньне магчымага выхаду Армэніі з АДКБ па-ранейшаму застаецца ў парадку дня краіны.
«Чаму паднялі гэтае пытаньне? Таму што наша разуменьне такое, што АДКБ пакінула або пакідае Рэспубліку Армэнію. Іншымі словамі, калі Рэспубліка Армэнія ўхваліць дэ-юрэ рашэньне аб выхадзе з АДКБ, то гэта адбудзецца ў выніку рэгістрацыі Рэспублікай Армэніяй выхаду АДКБ з Армэніі», — сказаў прэм’ер Армэніі.
Пазьней Дзьмітрый Пяскоў, прэсавы сакратар расейскага прэзыдэнта Ўладзіміра Пуціна паведаміў, што Расея прадоўжыць дыялёг з Армэніяй наконт АДКБ.
Раней сакратар Рады бясьпекі Армэніі Армэн Грыгар’ян заявіў, што на тле неэфэктыўнасьці Арганізацыі дагавору аб калектыўнай бясьпецы ў верасьні 2022 году ў часе «прамой агрэсіі Азэрбайджану» абмяркоўвалася пытаньне аб выхадзе з АДКБ. Ён таксама паведаміў, што Расея не выконвае вайсковых кантрактаў, падпісаных у 2021 годзе вартасьцю «сотні мільёнаў даляраў».
