Бібліятэкі пашыраюць час (з 19 да 23 гадзін) і фармат сваёй працы і арганізуюць кніжныя выставы, публічныя чытаньні, акцыі і іншыя культурныя мерапрыемствы, піша Reform.by.
Найбольш насычаная праграма чакаецца ў Цэнтральнай навуковай бібліятэцы НАН Беларусі. «Тэрыторыя навукі» — гэта адзінаццаць рознага кшталту інтэрактыўных выстаў з экскурсаводамі. Шмат музыкі, арт-лябараторыя, музэй займальных навук.
«Можна будзе зьдзейсьніць займальнае падарожжа ў далёкае мінулае і вывучыць экспанаты археоляга-антрапалягічнай выставы „Скура ды косткі“, — абяцаюць арганізатары мерапрыемства, — адчуць сябе сапраўднымі дасьледчыкамі мікрасьвету і каталізатараў, а таксама дакрануцца да таямніц хімічных зьяў».
Таксама прапануюць блёк навукова-папулярных лекцый. Антраполягі раскажуць пра тое, як зьмяняліся людзі на працягу апошняй тысячы гадоў. Гісторык Алег Дзярновіч раскажа пра фрэскі Крэўскага замка. Аляксандар Доўнар — пра мастацкае аздабленьне старажытных рукапісаў. Тацяна Даўгач — пра эпідэміі ХІХ стагодзьдзя. Вадзім Урублеўскі пазнаёміць з кнігамі па генэалёгіі Беларусі.
Нацыянальная бібліятэка Беларусі ўдзельнічае ў акцыі «Бібліяноч2023» з тэмай «БібліяІмпульс». У праграме — актыўныя квэсты ад кампаніі «Квэсторыя», «Літаратурны салён» зь сябрам Саюзу пісьменьнікаў Беларусі Ірынай Карнавухавай, шахматна-шашачныя турніры, «настолкі» ад Hobby World, «этнавечарына» з фолк-гуртам Guda і капэлай традыцыйнай музыкі «Анягож», чайны рытуал «Тры кубкі тэксту», лекцыі адваката, астрапсіхоляга, астроляга, нутрыцыёлага, імідж-стыліста, майстар-клясы па фантастычнай ілюстрацыі, сучасных бальных танцах, індыйскім танцы і многае іншае!
Маленькіх гасьцей пацешаць аквагрым, майстар-класы і ўзорны тэатар лялек «Васілёк», арт-тэатар Vershina, цыркавая студыя Fantasy, творчыя сустрэчы з дзіцячай пісьменьніцай Аленай Масла і пазнавальная IT-праграма ад вучэбнага цэнтра «Айціландыя».
У акцыі возьмуць удзел наступныя бібліятэкі:
У Менску:
- Нацыянальная бібліятэка Беларусі (пр. Незалежнасьці, 116), тэма «БібліяІмпульс»;
- Цэнтральная навуковая бібліятэка імя Якуба Коласа НАН Беларусі і Беларуская сельскагаспадарчая бібліятэка імя І. С. Лупіновіча НАН Беларусі (вул. Сурганава, 15), тэма «Тэрыторыя навукі»;
- Рэспубліканская навуковая мэдыцынская бібліятэка (вул. Фабрыцыуса, 28), тэма «Начны абанэмэнт»;
- Цэнтральная дзіцячая бібліятэка імя М. Астроўскага (пр. Газэты «Праўда», 20а), тэма «Бібліяпрыцемкі «Кніга і кампанія».
- Цэнтральная бібліятэка імя Янкі Купалы (вул. В. Харужай, 16), тэма «Традыцыі. Тое, што нас аб’ядноўвае»;
- Бібліятэка № 13 (вул. Народная, 43а), тэма «Кніга. Музыка. Тэатар».
У рэгіёнах:
- Навуковая бібліятэка Горадзенскага дзяржаўнага ўнівэрсытэту імя Янкі Купалы;
- Астравецкая раённая бібліятэка;
- Цэнтралізаваная сыстэма дзяржаўных публічных бібліятэк Магілёва;
- Сетка бібліятэк Кіраўскага раёна;
- Бібліятэчная сетка Клічаўскага раёна;
- Бібліятэчная сетка Крычаўскага раёна;
- Цэнтралізаваная сетка публічных бібліятэк Слаўгарадскага раёна;
- Бібліятэчная сетка Хоцімскага раёна;
- Цэнтралізаваная бібліятэчная сетка Шклоўскага раёна.
