Лінкі ўнівэрсальнага доступу

Камітэт Эўрапарлямэнту прагаласаваў за скарачэньне праектаў транспартнай інфраструктуры ў Беларусі і Расеі


Камітэт па транспарце і турызьме Эўрапейскага парлямэнту на пасяджэньні 13 красавіка падтрымаў скарачэньне праектаў транспартнай інфраструктуры з Расеяй і Беларусьсю.

Рашэньне прынятае ў рамках новых правілаў трансэўрапейскай транспартнай сеткі (TEN-T) з прычыны ўдзелу абедзьвюх краінаў у вайне супраць Украіны. Паралельна з гэтым камітэт прапануе ўмацоўваць партнэрства з Украінай і Малдовай.

Члены камітэту таксама хочуць, каб урады ЭЗ не дапускалі да ўдзелу ў буйных праектах TEN-T прадпрыемствы з краінаў, якія не ўваходзяць у ЭЗ, калі яны будуць несьці рызыку для бясьпекі.

Акрамя таго, пры будаўніцтве або мадэрнізацыі інфраструктуры TEN-T краіны Эўразьвязу павінны будуць забясьпечыць «бесперашкодную перакідку войскаў і матэрыялаў унутры ЭЗ».

Рашэньне камітэту павінна быць зацьверджанае на пленарным паседжаньні Эўрапарлямэнта. Затым пройдуць перамовы з краінамі — членамі Эўразьвязу на прадмет новага заканадаўства ў гэтай сфэры.

У ліпені 2022 года Эўрапейская камісія прапанавала выдаліць Расею і Беларусь з мапаў TEN-T — Трансэўрапейскай транспартнай сеткі (The Trans-European Transport Network). «Супрацоўніцтва з Расеяй і Беларусьсю ў галіне транспарту больш ня лічыцца ні дарэчным, ні адпаведным інтарэсам ЭЗ», — заявіла тады Эўракамісія. Пры гэтым была ўнесена прапанова, якая прадугледжвае прадаўжэньне чатырох транспартных калідораў ЭЗ на тэрыторыі Ўкраіны і Малдовы.

Эўракамісія адзначала, што такі плян «дапаможа палепшыць транспартныя зносіны гэтых дзьвюх краінаў з ЭЗ, прыяючы эканамічнаму абмену і паляпшаючы сувязі для людзей і бізнэсу». Гэтыя калідоры «таксама стануць ключавым прыярытэтам у аднаўленьні транспартнай інфраструктуры Ўкраіны пасьля заканчэньня вайны».

  • TEN-T — стратэгія транспартнай палітыкі ЭЗ, якая накіраваная на злучэньне Эўразьвязу і краінаў-партнэраў сеткай аўтамабільных дарог і чыгуначных шляхоў, аэрапортаў і воднай інфраструктуры, інтэграцыі краін у транспартныя калідоры эўрапейскай сеткі.
  • Стратэгія прадугледжвае, што разьвіцьцё трансэўрапейскай сеткі будзе садзейнічаць павышэньню бясьпекі руху, эфэктыўнасьці работы пагранічных пераходаў, а транспартныя сеткі — садзейнічаць эканамічнаму росту і павелічэньню тавараабароту паміж краінамі.

Санкцыі супраць Беларусі за падтрымку расейскай вайны ва Ўкраіне

Аляксандар Лукашэнка прызнаў, што зь Беларусі па ўкраінскай тэрыторыі стралялі ракетамі. Пры гэтым беларускіх вайскоўцаў на ўкраінскую тэрыторыю не адправілі.

Амбасадарка ЗША ў Беларусі Джулі Фішэр у інтэрвію Свабодзе заявіла, што «рэжым Лукашэнкі — саўдзельнік цяперашняга ўварваньня Расеі ва Ўкраіну, бо дазволіў Расеі зрабіць напад зь беларускай тэрыторыі».

26 лютага санкцыі супраць Расеі і Беларусі абвясьцілі Канада і Рада Эўразьвязу. У сьпіс трапілі 20 беларускіх чыноўнікаў і вайскоўцаў. 15 юрыдычных і 8 фізычных асобаў трапілі ў санкцыйны сьпіс ЗША.

28 лютага амбасадары краін Эўразьвязу ўвялі візавыя санкцыі ў дачыненьні 22 беларускіх высокапастаўленых асобаў.

Маладачанская фабрыка «МэбеЛайн» пайшла ў прастой, бо швэдзкая кампанія IKEA згарнула бізнэс у краіне. IKEA шчыльна супрацоўнічала яшчэ з цэлым шэрагам вытворцаў і фабрык, у тым ліку дзяржаўных. Сярод іх дзяржаўны «Менскі мэблевы цэнтар» з Маладэчна, магілёўскі вытворца тэкстылю «Магатэкс», менскі гадзіньнікавы завод «Луч» і іншыя.

У сакавіку Эўразьвяз забараніў экспартаваць прадукцыю дрэваапрацоўкі, вырабленую ў Беларусі ці экспартаваную зь яе. Міністэрства лясной гаспадаркі заявіла, што вымушана скіраваць прадукцыю з Эўропы ў Азію.

Празь цяжкасьці вядзеньня бізнэсу ў рэгіёне ня дзейнічаюць у краіне сэрвісы пошуку жытла на час падарожжаў і выправаў Booking.com і Airbnb.

Дацкая транпартна-лягістычная кампанія Maersk заявіла аб спыненьні перавозак грузаў у Беларусь 4 сакавіка. Пры сыход зь беларускага рынку паведамілі іншыя кампаніі падобнага профілю — DHL і FedEx.

5 сакавіка фінская кампанія OLVI паведаміла пра пачатак згортваньня свайго бізнэсу ў Беларусі, дзе кампаніі належыць «Лідзкае піва». 840 супрацоўнікаў заводу пакуль будуць атрымліваць заробак, спыненьне бізнэсу будзе паступовым.

6 сакавіка наклала санкцыі Рэспубліка Карэя. Там увялі меры экспартнага кантролю для Беларусі, мяркуючы, што яна «істотна спрыяе ўварваньню Расеі ва Ўкраіну».

8 сакавіка санкцыі ўвяла Японія. Актывы фізычных і юрыдычных асобаў, якія трапілі пад новыя абмежаваньні, замарожваюцца. Забараняюцца пастаўкі тавараў двайнога прызначэньня ў Беларусь і экспарт у адрас Міністэрства абароны Беларусі і «Інтэгралу».

Сусьветны банк спыніў усе праграмы ў Беларусі. Банк адзначыў, што ён не ўхваляў новых крэдытаў Беларусі з 2020 году.

Абмежаваньні закранулі спартовую галіну. Зборныя Беларусі розных узростаў адхілілі ад удзелу ў міжнародных турніраў у хакеі, гандболе і баскетболе. Беларускую зборную не дапусьцілі да Паралімпійскіх гульняў — 2022.

Рэйтынгавае агенцтва Fitch, зважаючы на санкцыі, панізіла доўгатэрміновы сувэрэнны крэдытны рэйтынг Беларусі да ССС, што азначае рэальную магчымасьць дэфолту.

Амэрыканская фінансавая кампанія American Express прыпыніла аказаньне паслуг у краіне. Па яе картках цяпер немагчымыя ніякія апэрацыі.

9 сакавіка Эўразьвяз ухваліў адключэньне ад SWIFT трох беларускіх банкаў. Гэта «Белаграпрамбанк», банк «Дабрабыт» і Банк разьвіцьця.

16 красавіка ўведзена поўная забарона на перасячэньне грузавым транспартам Беларусі і Расеі мяжы з ЭЗ. У рашэньні Эўразьвязу, якое апублікавана ў афіцыйным часопісе, сказана, што ЭЗ у адпаведнасьці з уведзенымі санкцыямі забараняе ўвоз і транзыт грузаў аўтатранспартам зь Беларусі і Расеі на тэрыторыю Эўразьвязу.

22 лістапада Канада пашырыла ранейшыя санкцыі. У сьпісы ўключылі дадаткова 22 беларускіх чыноўнікаў, а таксама 16 беларускіх кампаніяў, зьвязаных з ВПК, машынабудаваньнем, фінансавым сэктарам і чыгуначным транспартам. Сярод падсанкцыйных асобаў апынуліся адказныя за перавозкі расейскіх вайскоўцаў і тэхнікі, якая выкарыстоўвалася для ўварваньня ва Ўкраіну. У сьпісе кампаніяў, якія трапілі пад санкцыі, апынуліся беларускія Альфа-Банк і МТБанк. У красавіку 2023 у сьпіс дадалі яшчэ 9 беларускіх банкаў.

28 студзеня 2023 году прэзыдэнт Украіны ўвёў у дзеяньне рашэньне Рады нацыянальнай бясьпекі і абароны аб санкцыях супраць 185 юрыдычных і фізычных асоб, якіх Расея выкарыстоўвае для перавозкі па чыгунцы асабовага складу і вайсковай тэхнікі. У сьпіс трапілі «Беларуськалій», Гомельскі хімічны завод, «Беларуская чыгунка», «Белінтэртранс», «Грузавая служба-Захад», «Лякафарба», «Белгазпрамбанк», «ПЛМ-Інавацыі», «Кронаспан ОСБ», «Беллесэкспарт», «Супрацоўніцтва Транс-Агра», «Рэал-Агент», «Прамагралізінг», «АСБЛізінг», «Транзыт-Аўта-2003», «Ізатэрмічная лягістыка», «Омск-Карбон Магілёў» і іншыя.

20 ліпеня Аўстралія ўнесла ў санкцыйныя сьпісы высокапастаўленых вайскоўцаў Беларусі.

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG