Лінкі ўнівэрсальнага доступу

Лекары мілянскай клінікі пацьвердзілі леўкемію ў Сыльвіё Бэрлюсконі


Сыльвіё Бэрлюсконі і Ўладзімір Пуцін, 2015 год
Сыльвіё Бэрлюсконі і Ўладзімір Пуцін, 2015 год

Былы прэм’ер-міністар Італіі Сыльвіё Бэрлюсконі, якому цяпер 86 гадоў, ужо некаторы час хворы на хранічны міелёідны леўкоз — гэта форма леўкеміі, раку крыві. Цяпер Бэрлюсконі шпіталізаваны ў рэанімацыю для лячэньня пнэўманіі.

Пра гэта гаворыцца ў распаўсюджанай у чацьвер заяве лекараў мілянскай клінікі «Сан-Рафаэле».

Як адзначае агенцтва DPA, першапачаткова, калі ў сераду палітыка даставілі ў лякарню, гаварылася аб рэсьпіраторных і сардэчна-судзінных праблемах.

Пра дыягназ «леўкоз» у экс-прэм’ера першай 6 красавіка паведаміла газэта Corriere della Sera. Па дадзеных выданьня, Бэрлюсконі быў шпіталізаваны з падазрэньнем на пнэўманію, якая магла быць выкліканая аслабленьнем імунітэту з прычыны леўкозу. Агенцтва ANSA паведамляла са спасылкай на крыніцы, што Бэрлюсконі ўжо праходзіць у «Сан-Рафаэле» курс хіміятэрапіі, піша Расейская служба ВВС.

Мэдыямагнат Сыльвіё Бэрлюсконі тройчы займаў пасаду кіраўніка ўраду, пасьля таго як у 1994 годзе прыйшоў у палітыку. Для мільёнаў італьянцаў, нягледзячы на сэрыю зьвязаных зь яго імем сэксуальных скандалаў і судовых разбораў, уключаючы абвінавачаньне ў 2012 годзе ва ўхіленьні ад сплаты падаткаў, Бэрлюсконі асацыюецца з залатым векам італьянскай эканомікі і вобразам чалавека, які ўсяго дасягнуў сам, адзначае France Presse.
Цяпер партыя Бэрлюсконі «Наперад, Італія» ўваходзіць у кіруючую кааліцыю, а сам экс-прэм’ер зь верасьня мінулага году засядае ў Сэнаце XIX скліканьня.

Год таму Бэрлюсконі, выступаючы перад прыхільнікамі сваёй партыі, сказаў, што «расчараваны» ў расейскім прэзыдэнце Ўладзіміру Пуціну з прычыны ўварваньня ва Ўкраіну. Раней Бэрлюсконі неаднаразова называў Пуціна сваім сябрам. Яны рэгулярна наведвалі адзін аднаго. Аднойчы італьянскі палітык нават назваў Пуціна «апошнім выдатным лідэрам на сучаснай міжнароднай палітычнай арэне».

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG