Сьвятлана Ціханоўская паведаміла, што падчас візыту правяла 17 афіцыйных сустрэчаў — у Белым доме, Дзярждэпартамэнце, Кангрэсе ЗША, Міністэрстве працы і ў прафсаюзах. Таксама адбыліся сустрэчы з палітыкамі, прадстаўнікамі трох дзясяткаў арганізацый, сярод якіх — Міжнародны PEN-цэнтар, праваабарончая арганізацыя Freedom House, Амэрыканская асацыяцыя юрыстаў, Камітэт абароны журналістаў, а таксама сустрэча зь беларускай дыяспарай.
Вось што кажа Ціханоўская пра вынікі візыту:
- Падчас візыту Злучаныя Штаты аб’явілі аб запуску стратэгічнага дыялёгу з дэмакратычнай Беларусьсю. Гэта значыць, што ўжо напрыканцы 2023 году дэмакратычныя сілы фармалізуюць супрацу з урадам ЗША. Да дыялёгу запросяць прадстаўнікоў Каардынацыйнай рады і грамадзянскай супольнасьці Беларусі. Дэмсілы выпрацуюць стратэгію беларуска-амэрыканскіх адносінаў і адновяць усе кантакты, якія былі разбураныя Лукашэнкам.
- У бліжэйшыя некалькі месяцаў ЗША прызначаць адмысловага пасланьніка для супрацы з дэмакратычнымі сіламі. Ён будзе галоўнай кантактнай асобай паміж дэмакратычнай Беларусьсю і Вашынгтонам.
- ЗША не падтрымліваюць зьмякчэньне санкцыяў на транзыт калійных угнаеньняў праз краіны Эўразьвязу, над чым актыўна працуюць лабісты рэжыму.
- ЗША захаваюць памер дапамогі Беларусі ў аб’ёме 30 мільёнаў даляраў. Гэтыя грошы пойдуць на падтрымку незалежных СМІ, праваабаронцаў, НДА і рэпрэсаваных.
- У Кангрэсе ЗША пачалася праца над новым законам аб дэмакратыі, сувэрэнітэце і правах чалавека ў Беларусі. Гэты закон дапаможа зрабіць падтрымку ЗША больш сыстэмнай і пасьлядоўнай.