Лінкі ўнівэрсальнага доступу

Латушка: рэжым Лукашэнкі выкарыстоўвае пасярэдніцтва трэціх краін для абыходу заходніх санкцый


Павал Латушка
Павал Латушка

Беларускія ўлады выкарыстоўваюць пасярэдніцтва трэціх краін для абыходу заходніх санкцый, заявіў кіраўнік Народнага антыкрызіснага ўпраўленьня Павал Латушка на круглым стале «Санкцыйная палітыка ў дачыненьні да рэжыму Лукашэнкі: праблемы і эфэктыўнасьць», які праходзіць 22 сакавіка ў Варшаве, паведамляе BPN.

«Гэтую праблему можна вырашыць толькі шляхам устанаўленьня гандлёвых квотаў, зыходзячы з аб’ёму таваразвароту да пачатку вайны [ва Ўкраіне]», — лічыць палітык.

Таксама, на яго думку, санкцыі трэба структураваць, каб аблегчыць маніторынг іх выкананьня.

«Магчымасьці рэжыму па стварэньні фірмаў-аднадзёнак і фіктыўнай перадачы актываў перашкаджаюць эфэктыўнасьці санкцыяў», — зазначыў Павал Латушка.

Адной з праблем ён назваў адсутнасьць гарманізацыі санкцыяў супраць Беларусі і Расеі, што дае Беларусі магчымасьці абыходзіць іх праз Расею. «Гэтая законная кантрабанда выкарыстоўваецца для дастаўкі крытычных кампанэнтаў для вайскова-прамысловага комплексу абедзьвюх краін», — дадаў Латушка.

Акрамя таго, палітык адзначыў «прабелы ў сыстэме фінансавых разьлікаў», якія даюць рэжыму Лукашэнкі магчымасьць абыходзіць эканамічныя санкцыі.

Гаворачы пра пэрсанальныя санкцыі з боку ЭЗ і асобных дэмакратычных дзяржаў, Латушка зьвярнуў увагу на іх немаштабнасьць і наяўнасьць бюракратычных перашкодаў: «Нашы партнэры заяўляюць, што на ўвядзеньне пэрсанальных абмежаваньняў існуе негалосны ліміт: 5–10 чалавек, як было прапанавана ў апошні пакет ЭЗ, і ня больш. Хоць каманда НАУ прапанавала 340 прозьвішчаў».

У той жа час рэжым Лукашэнкі прызнае шкоду ад санкцыяў, адзначыў намесьнік кіраўніка Аб'яднанага пераходнага кабінэту.

«Нават беларуская статыстыка, якая мае ўсе падставы для перабольшваньня [рэальнасьці] з боку рэжыму, адлюстроўвае эфэкт ад іх. Ужо сёньня рэжым адчувае цяжкасьці з паступленьнем валюты. За 2022 год золатавалютныя рэзэрвы скараціліся на 500 млн даляраў», — сказаў ён.

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG