Лінкі ўнівэрсальнага доступу

На зьезьдзе русафілаў у Маскве Беларусь прадстаўляў дэлегат, які раней гаварыў пра распад Расеі і шкоду славянафільства


Аляксей Дзермант
Аляксей Дзермант

У сераду ў Маскве завершыўся ўстаноўчы сход Міжнароднага руху русафілаў (МДР). Створаную пад эгідай Крамля арганізацыю ўзначаліў баўгарскі палітык Мікалай Малінаў, якога на радзіме афіцыйна абвінавачваюць у шпіянажы на карысьць Расеі.

Міжнародны рух русафілаў зоймецца зборам 1 мільёна подпісаў у заходніх краінах за зьняцьце антырасейскіх санкцый, а таксама стварэньнем Інстытуту барацьбы з русафобіяй і рэалізацыяй ідэі конкурсу, які б стаў антыподам «Эўравізіі».

У кангрэсе ўзялі ўдзел госьці з 42 краін, сярод якіх былы галівудзкі актор Стывэн Сігал і ўнук былога прэзыдэнта Францыі Шарля дэ Голя П’ер. Быў на зьезьдзе і дэлегат зь Беларусі Аляксей Дзермант.

Дзермант называе сябе філёзафам і працуе ў Акадэміі навук Беларусі. Часта выступае ў дзяржаўных СМІ, дзе хваліць рэжым Лукашэнкі і крытыкуе дэмакратычны рух Беларусі.

У 2002 годзе Дзермант быў адным з заснавальнікаў суполкі «GEGA рух», якая пазыцыянавала сябе як прадстаўніцтва эўрапейскага ультраправага нэаязычніцкага руху Heathen Front. У ліку сваіх папярэднікаў «GEGA рух» бачыў, сярод іншых, дзеячаў Беларускай нацыянал-сацыялістычнай партыі.

У 2010 годзе ў інтэрвію Радыё Свабода Дзермант заявіў, што беларусам «варта пазбаўляцца ад славянафільскіх і савецкіх поглядаў на гісторыю і ўласнае паходжаньне», а таксама выказаў думку, што балцкая арыентацыя перасьцерагла б ад панславізму, які дыскрэдытаваў сябе. У 2012 годзе Дзермант быў удзельнікам круглага стала «Распад Расеі: пагрозы і стратэгіі рэгіянальнай бясьпекі», падчас якога раскрытыкаваў Эўразійскі саюз.

У 2010-я гады Дзермант супрацоўнічаў з польскай нэапаганскай арганізацыяй Niklot, якая выступала супраць зьмешваньня расаў і лічыла хрысьціянства дэструктыўнай зьявай.

У сьнежні 2014 году Аляксей Дзермант выступаў у Парыжы, на канфэрэнцыі арганізацыі «Terre et Peuple» (Зямля і чалавек). Гэта таксама нэапаганская арганізацыя, якая гаворыць пра небясьпеку «этнічнай калянізацыі» Эўропы нэаэўрапейцамі зь іншай «біялягічнай інфраструктурай».

У зьезьдзе ў Маскве прынялі ўдзел міністар замежных спраў Расеі Сяргей Лаўроў, радыкальны філёзаф Аляксандар Дугін, які актыўна выступае ў падтрымку вайны ва Ўкраіне, заснавальнік тэлеканала «Царьград» бізнэсовец Канстанцін Малафееў. Вітаньні накіравалі прэзыдэнт Расеі Ўладзімер Пуцін і патрыярх Кірыл. Удзельнікі міжнароднага зьезду русафілаў аб’ядналіся вакол тэзы аб тым, што рух уяўляе сабой «фронт барацьбы з фашызмам», барацьбу супраць «дэкадэнцкага Захаду», які разьвязаў, на іх думку, барацьбу з Расеяй, і нейкага «гендэрнага міру».

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Падсумаваньне тыдня на Свабодзе – у адным суботнім лісьце! Усе эксклюзіўныя і важныя публікацыі за тыдзень – у нашай эмэйл-рассылцы: так вы ніколі не прапусьціце самае цікавае!

Дык падпісвайцеся!

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG