Парлямэнт Фінляндыі ўхваліў законапраект аб уступленьні ў NATO. За прагаласавалі 184 дэпутаты, супраць — сем. Яшчэ сямёх не было на паседжаньні, а адзін устрымаўся.
29 чэрвеня 2022 году краіны NATO вырашылі афіцыйна запрасіць у сябры Альянсу Фінляндыю і Швэцыю, якія раней адмовіліся ад нэўтралітэту і вырашылі ўступіць у NATO зь меркаваньняў бясьпекі пасьля нападу Расеі на Украіну.
Адобрыць пагадненьне аб прыёме ў NATO двух новых сяброў павінны ўсе 30 краін — сяброў абарончага саюзу. Адпаведнае рашэньне прынялі ўжо 28 краін.
Першапачаткова Турэччына заблякавала перамовы аб уступленьні Швэцыі і Фінляндыі ў Альянс. Аднак пазьней Турэччына, Швэцыя і Фінляндыя заключылі пагадненьне па бясьпецы, якое разблякавала працэс далучэньня абедзьвюх паўночных краін да арганізацыі.
Сярод пытаньняў Анкары да патэнцыйных партнэраў па Альянсе была падтрымка імі Рабочай партыі Курдыстану, якая ў Турэччыне лічыцца тэрарыстычнай групоўкай.
Генэральны сакратар NATO Енс Столтэнбэрг абвясьціў, што ў рамках пагадненьня Анкара дамаглася ад Швэцыі і Фінляндыі абяцаньня экстрадаваць у Турэччыну мігрантаў, абвінавачаных Стамбулам у тэрарызьме.
