«Гэтыя меры прымаюцца ў сувязі зь вялікімі плынямі кантрабанды, якая перавозіцца цягнікамі зь Беларусі, і зьвязанай з гэтым падвышанай пагрозай нацыянальнай бясьпецы Літвы», — патлумачылі ў Літоўскай мытні рашэньне закрыць рух адсутнасьцю рэнтгенаўскай сыстэмы надгляду на станцыі Стасілас.
Мытня адзначае, што апошнія гады аб’ём кантрабанды, у першую чаргу цыгарэт, зь Беларусі праз Стасілас значна вырас. Летась на Стасілас прыпала 87% цыгарэт, перахопленых на чыгунцы. У той жа час абʼём кантрабанднага патоку праз Кяну зьнізіўся пасьля ўстаноўкі там рэнтгенаўскага комплексу.
Пра рашэньне Літвы закрыць для беларускіх цягнікоў пункт пропуску «Стасілас» стала вядома 14 лютага.
Пазьней 15 лютага ў Менску пракамэнтавалі закрыцьцё аднаго з двух чыгуначных пераходаў на мяжы зь Літвой.
У Мінтрансе Беларусі заявілі, што гэтае рашэньне нібыта не паўплывае на тэхналягічную работу БЧ на беларуска-літоўскай мяжы за кошт перанакіраваныя вагонапатокаў праз чыгуначны памежны пераход «Гудагай — Кяна».
