Мурал разьмешчаны на сьцяне аднаго з дамоў у горадзе Маргіт, у Паўднёва-Ўсходняй Англіі. На ім дзяўчына ў фартуху і гаспадарчых пальчатках, зь сіняком на твары і выбітым зубам. Побач з жаночай выявай — маразільная камэра, зь якой тырчаць ногі ў мужчынскіх чаравіках.
У інстаграме праца называецца «Туш на Дзень сьвятога Валянціна».
Бэнксі — адзін з самых вядомых у сьвеце мастакоў стрыт-арта. Хто менавіта хаваецца за гэтым псэўданімам — мужчына, жанчына ці творчы калектыў, — невядома. Графіці Бэнксі нярэдка зьяўляюцца ў пунктах сацыяльных і ваенных канфліктаў.
Увосень мінулага году Бэнксі стварыў сэрыю графіці на сьценах разбураных дамоў ва Ўкраіне. Яго творы ёсьць на вуліцах Кіева, Ірпяня, Барадзянкі і Гастомеля. Яны сымбалізуюць пакуты нязломнага народу Ўкраіны.
У лістападзе мінулага году адміністрацыя Барадзянкі паведаміла, што надасьць графіці Бэнксі афіцыйны статус аб'екта культурнай спадчыны.
