Сяргей Паско звольнены са службы ў запас па хваробе з правам нашэньня ўстаноўленай формы адзеньня і знакаў адрозьненьня, — паведамляе Zerkalo.
Таксама Лукашэнка звольніў генэрал-маёра міліцыі Мікалая Мельчанку са службы ў органах унутраных спраў у запас па ўзросьце. У 2019 годзе Мельчанку зьнялі з пасады намесьніка міністра ўнутраных спраў — начальніка міліцыі грамадзкай бясьпекі і прызначылі на пасаду афіцыйнага прадстаўніка МУС у амбасаду Рэспублікі Беларусь ва Ўкраіне і па сумяшчальніцтве ў Рэспубліцы Малдова.
- У студзені 2023 году гучны рэзананс у грамадзтве набыло абвінавачаньне ў «распаўсюдзе ідэяў беларускага нацыяналізму», якое выказаў Сяргей Паско на адрас Паўла Белавуса.
«Пад выглядам культурна-гістарычнага разьвіцьця ў розных агульнадаступных сацыяльных сетках і на сайтах ён распаўсюджваў ідэі беларускага нацыяналізму, мэтай якіх зьяўлялася зьмена дзяржаўнай улады ў Беларусі. Абвінавачаны зарэгістраваўся ў якасьці індывідуальнага прадпрымальніка і заснаваў таварыства з абмежаванай адказнасьцю (крама па онлайн- і офлайн-продажы тавараў), пасьля чаго пачаў праводзіць розныя масавыя імпрэзы», — паведамляў у студзені 2023 тагачасны начальнік упраўленьня Сьледчага камітэту па Менску Сяргей Паско.
