Вынесьлі прысуд у справе «Рабочага руху»: да 15 гадоў турмы 

Працэс над дзесяцьцю палітзьняволенымі фігурантамі справы «Рабочага руху» праходзіў у Гомельскім абласным судзе з 9 лістапада.

17 лютага судзьдзя Аляксандар Піскуноў пакараў:

• Сяргея Шэлеста — 14 гадамі калёніі ва ўмовах узмоцненага рэжыму;
• Уладзімера Жураўку — 15 гадамі калёніі а ўмовах узмоцненага рэжыму;
• Андрэя Пагерылу — 14 гадамі калёніі ва ўмовах узмоцненага рэжыму;
• Ганну Аблаб — 11 гадамі калёніі ва ўмовах агульнага рэжыму;
• Аляксандра Гашнікава — 14 гадамі калёніі ва ўмовах узмоцненага рэжыму;
• Сяргея Дзюбу — 12 гадамі калёніі ва ўмовах узмоцненага рэжыму;
• Ігара Мінца — 12 гадамі калёніі ва ўмовах узмоцненага рэжыму;
• Валянціна Цераневіча — 12 гадамі калёніі ва ўмовах узмоцненага рэжыму;
• Сяргея Шамецьку — 12 гадамі калёніі ва ўмовах узмоцненага рэжыму;
• Аляксандра Капшуля — 15 гадамі калёніі ва ўмовах узмоцненага рэжыму.

Апрача таго, для асуджаных прадугледжаныя штрафы ў памерах ад 100 да 500 базавых велічынь.

Усіх фігурантаў абвінавацілі ў «здрадзе дзяржаве» (ч. 1 арт. 356 КК) і «стварэньні экстрэмісцкага фармаваньня» (ч. 3 арт. 361-1 КК). Капшуля дадаткова — у «незаконных дзеяньнях у дачыненьні агнястрэльнай зброі» (ч. 2 арт. 295 КК). Шэлеста, Жураўку і Пагерылу дадаткова — у «паклёпе» (арт. 188 КК).

ГЛЯДЗІЦЕ ТАКСАМА:

«Ён вельмі мэтанакіраваны, валявы чалавек». Што вядома пра юрыста Аляксандра Капшуля, які 48 дзён галадае ў турме

Падчас судовых паседжаньняў усе дзесяцёра падсудных не прызналі віны ў здрадзе дзяржаве.

Таксама у час разгляду справы «Рабочага руху» адзін зь фігурантаў, Аляксандар Капшуль, некалькі тыдняў трымаў галадоўку у знак пратэсту супраць парушэньня заканадаўства падчас яго ўтрыманьня ў гомельскім СІЗА.

Капшуля затрымалі 25 верасьня 2021 году на тэрыторыі Расейскай Фэдэрацыі і перадалі супрацоўнікам КДБ Беларусі, якія тайна вывезьлі яго ў Менск. Паводле зьвестак праваабаронцаў, у палітвязьня была зламаная нага і пашкоджаная рука.

• «Рабочы рух» узьнік у 2020 годзе. У ім аб’ядналіся беларускія рабочыя, у тым ліку лідэры і актывісты страйкаў 2020 году. Справай «Рабочага руху» займаўся КДБ. Падставай для яе завядзеньня сталі спробы арганізаваць страйк на буйных прамысловых прадпрыемствах.

ГЛЯДЗІЦЕ ТАКСАМА:

Суд у справе «Рабочага руху» зрабілі закрытым