Ранкам 29 сьнежня многія СМІ паведамілі аб магчымым падзеньні ў вёсцы Гарбаха Янаўскага раёну ракеты з комплексу С-300. Тэлеграм «Пул первого» ўжо адрэагаваў, што адбылося падзеньне ўкраінскай ракеты.
Свабода спыталася ва ўкраінскага вайсковага экспэрта Алега Жданава аб тым, ці магло сапраўды такое здарыцца і якія наступствы можа мець.
«Я думаю, гэта немагчыма, што ўкраінская ракета заляцела на тэрыторыю Беларусі. З боку Беларусі прылётаў па Ўкраіне апошнім часам няма. У нашай СПА проста не было падставаў страляць у бок Беларусі для зьбіцьця ракет. А ракетных войскаў у нас няма апрыёры, таму я ня ведаю, што там магло прыляцець», — сказаў Жданаў.
Ён лічыць, што гэты інцыдэнт больш падобны да правакацыі.
«Прычым, магчыма, накід ідзе нават ня з боку Беларусі, а Расейскай Фэдэрацыі».
Алег Жданаў пацьвярджае, што ракеты С-300 ёсьць на ўзбраеньні і Ўкраіны, і Беларусі з Расеяй. Прычым ва ўсіх краінах устаноўкі аднолькавыя. Вызначыць, чыя менавіта гэта была ракета, дастаткова нескладана.
«Патрэбна толькі знайсьці аскепак ракеты з сэрыйным нумарам. І тады адразу стане зразумела, дзе гэтая ракета выпушчаная, у якім годзе, і ў якой вайсковай частцы яна была. Калі ракета ўпала, то пакажыце яе сэрыйны нумар — і ўсё», — кажа Жданаў.
Экспэрт не выключае, што гэта можа быць правакацыя з мэтай уцягваньня Беларусі ў вайну ва Ўкраіне.
«У нас на мінулым тыдні была інфармацыя аб тым, што ў Беларусь прыбылі байцы прыватнай вайсковай кампаніі „Вагнэр“. Цалкам магчыма, што яны рыхтуюць вайну пад чужым сьцягам, каб максымальна ўцягнуць Беларусь у вайну на баку Расеі».
Тым ня менш аналітык лічыць, што ўсё гэта скончыцца, хутчэй за ўсё, толькі палітычнымі заявамі з боку Лукашэнкі, але не выкарыстаньнем сілавога мэтаду.
«Улічваючы магчымасьці КДБ Беларусі, я ўпэўнены, што Лукашэнка дакладна ведае, чыя гэта ракета і хто яе пускаў», — падсумоўвае Алег Жданаў.
