Праваабаронцам сталі вядомыя вынікі судовага працэсу над стаматолягам-артапэдам мэдыка-санітарнай часткі «Гродна Азот» Аляксандрам Дураевым, які амаль 50 разоў у сацыяльных сетках абразіў прадстаўнікоў улады, у тым ліку Лукашэнку.
Працэс, які вёў судзьдзя Віталь Лабоцкі, пачаўся сёлета 28 красавіка, але разгляд прыпынялі для правядзеньня комплексных лінгвістычных экспэртызаў. Затым, 20 верасьня, у працэсе абвясьцілі чарговы перапынак, каб даць магчымасьць абвінавачанаму сплаціць матэрыяльныя кампэнсацыі маральнай шкоды пацярпелым.
Аляксандра Дураева затрымалі ў пачатку студзеня 2022 году. Трымалі да суду ў горадзенскай турме № 1.
На відэа ператрусу дому Аляксандра на канале ГУБАЗіК паказалі пісталет, патроны і часопісы з аголенымі жанчынамі. Абвінавачаны растлумачыў, што патроны ён прывёз з Манголіі, яны ў яго захоўваюцца з 1990-га. Які закон ён парушыў часопісамі і чаму на іх зьвярнулі ўвагу, сілавікі не абгрунтавалі.
На судзе агучвалі вынікі шматлікіх лінгвістычных экспэртызаў.
Паводле адной зь іх, ненарматыўнай формай маўленчага выказваньня ў дачыненьні да Аляксандра Лукашэнкі прызнаныя словы «псыхапат», «звар’яцелы», «карнік і дыктатар», «жывёла» і дзясяткі іншых. Іншыя выразы (агулам іх на некалькі дзясяткаў старонак справы) прызнаныя непрымальнай формай выказваньня.
У выніку лекара абвінавацілі ў абразе прадстаўніка ўлады (арт. 369), абразе і паклёпе на Аляксандра Лукашэнку (ч. 1 арт. 368 і ч. 2 арт. 367), а таксама ў незаконных дзеяньнях у дачыненьні да агнястрэльнай зброі, боепрыпасаў і выбуховых рэчываў (ч. 2 арт. 295 Крымінальнага кодэксу). У сукупнасьці пакараньняў 29 верасьня мужчыну канчаткова прызначылі 3 гады ў калёніі агульнага рэжыму.
У Менску затрымалі вядучага інжынэра «Менскэнэрга». У «Віцебскэнэрга» — ператрус
Вядучага інжынэра «МенскЭнэрга» абвінавачваюць у перадачы пэрсанальных зьвестак больш за 500 службовых асобаў тэлеграм-каналам. Яму выставілі абвінавачаньне паводле ч. 6 арт. 16 і ч. 3 арт. 130 КК («дапамога ў распальваньні варажнечы, здзейсьненым групай асобаў»), паведамляе «Вясна».
У «Віцебскэнэрга» сілавікі прыходзілі зь ператрусам да начальніцы аддзелу бухгальтарскага ўліку і эканамічнага плянаваньня. Спачатку яе забралі ў КДБ, а потым арыштавалі на 15 дзён і зьмясьцілі ў ІЧУ.
У Паставах адбыліся масавыя затрыманьні
24 лістапада ГУБАЗіК правёў «аблаву» ў Паставах, паведаміў глыбоцкі Кастусь Шыталь.
«Сярод затрыманых Юры Дзіковіч, Уладзімер Лашчотка, Сяргей Ляўко. У Дзіковіча быў ператрус яшчэ ў пачатку 2021 году, ён быў у статусе падазраванага за нейкі камэнтар у Telegram.
Мясцовыя паведамляюць, што прынамсі супраць часткі затрыманых маглі быць распачатыя крымінальныя справы», — напісаў Шыталь у Facebook.
Паводле «Нашай нівы», ператрусы ў Паставах адбыліся прынамсі ў 11 чалавек. Траіх затрымалі, а аднаго з іх сілавікі звезлі ў Мінск. Нагодай для масавага пераследу жыхароў Паставаў мясцовыя называюць пратэсты 2020 году і крытыку кіраўніка раёну.
