Міністэрства абароны Турэччыны заявіла раніцай у нядзелю, што нанесла авіяўдары па базах курдзкіх баевікоў на поўначы Сырыі і поўначы Іраку. Паводле ведамства, атакаваныя базы выкарыстоўваліся для нападаў на турэцкую тэрыторыю.
Удары былі нанесены па базах забароненай у Турэччыне Рабочай партыі Курдыстану (РПК) і апалчэньня сырыйскіх курдаў YPG, якія Турэччына адносіць да крыла РПК, піша Reuters.
Яшчэ 15 лістапада Турэччына заявіла, што плянуе ставіць задачы на поўначы Сырыі пасьля завяршэньня трансгранічнай апэрацыі супраць баевікоў РПК у Іраку, што адбылася пасьля сьмяротнага выбуху ў мінулыя выходныя ў Стамбуле.
Урад абвінаваціў менавіта курдзкіх баевікоў у выбуху на праспэкце Істыкляль 13 лістапада, у выніку якога загінулі шэсьць чалавек і больш за 80 атрымалі раненьні. Ні адна групоўка, аднак, ня ўзяла на сябе адказнасьць за выбух, а курдзкія баевікі адмаўляюць сваю датычнасьць да тэракту.
Сырыйскія дэмакратычныя сілы (SDF), якія ўзначальваюць курды, заявілі, што турэцкая авіяцыя ў суботу абстраляла дзьве вёскі, населеныя ўнутранымі перамешчанымі асобамі на поўначы Сырыі.
Турэччына зьдзейсьніла тры ўварваньні на поўнач Сырыі супраць апалчэньня YPG. Прэзыдэнт Рэджэп Эрдаган раней заяўляў, што яго краіна можа правесьці яшчэ адну апэрацыю супраць YPG.
