Паводле паведамленьня МЗС Польшчы, «15 лістапада 2022 году з боку ўзброеных фармаваньняў Расейскай Фэдэрацыі быў праведзены чарговы працяглы канцэнтраваны абстрэл усёй тэрыторыі Ўкраіны і яе крытычнай інфраструктуры. У 15.40 у вёсцы Пшэводаў Грубешаўскага павету Люблінскага ваяводзтва ўпаў снарад расейскай вытворчасьці, у выніку чаго загінулі двое грамадзян Рэспублікі Польшчы. У сувязі з гэтым інцыдэнтам міністар замежных справаў Зьбігнеў Раў выклікаў амбасадара РФ у МЗС з патрабаваньнем неадкладна даць падрабязныя тлумачэньні».
Пазьней прэс-сакратар МЗС Польшчы Лукаш Ясіна заявіў, што размова з амбасадарам Сяргеем Андрэевым ужо адбылася. Яна скончылася апоўначы. Пра вынікі размовы пакуль не паведамляюць.
Пастаянны прадстаўнік Польшчы пры ААН Кшыштаф Шчэрскі ў сваім твітэры адзначыў, што Польшча прадставіць сваю пазыцыю наконт падзеньня ракет у сераду на пасяджэньні Рады бясьпекі.
Прэм’ер-міністар Матэвуш Маравецкі заявіў, што краіна павышае боегатоўнасьць Узброеных Сілаў і можа запытаць хаўрусьнікаў пра магчымасьць выкарыстаньня 4-га артыкулу NATO аб кансультацыях.
Прэзыдэнт Польшчы Анджэй Дуда анансаваў, што прадстаўнік краіны пры NATO Томаш Шаткоўскі возьме ўдзел у пасяджэньні Рады Паўночнаатлянтычнага альянсу. Ён выказаў спачуваньні сем’ям двух загінулых ад выбухаў ракеты, якая «ўпала на польскую тэрыторыю за 6 км ад мяжы з Украінай».
Таксама Дуда заявіў аб размовах з прэзыдэнтам ЗША Джо Байдэнам і генэральным сакратаром NATO Енсам Столтэнбэргам. Акрамя таго, польскі прэзыдэнт адзначыў, што пакуль нічога не гаворыць аб тым, што на тэрыторыі Польшчы можа адбыцца нешта яшчэ. Байдэн, у сваю чаргу, заявіў, што ЗША правядуць расьсьледаваньне, піша AP.
Польскія мэдыя і агенцтва Associated Press увечары 15 лістапада паведамілі, што на тэрыторыі Польшчы непадалёк ад мяжы з Украінай у аўторак упалі дзьве ракеты. Затым улады пацьвердзілі падзеньне ракет і паведамілі, што загінулі два чалавекі.
Рэакцыя Расеі
Прэс-сакратар Крамля Дзьмітрый Пяскоў заявіў CNN, што не валодае інфармацыяй аб інцыдэнце на ўсходзе Польшчы.
«На жаль, у мяне няма ніякай інфармацыі на гэты конт», — цытуе CNN словы Пяскова.
Міністэрства абароны Расеі назвала інфармацыю польскага боку «наўмыснай правакацыяй».
«Заявы польскіх сродкаў масавай інфармацыі і афіцыйных асобаў аб нібыта падзеньні „расейскіх“ ракет у раёне населенага пункту Пшэводаў ёсьць наўмыснай правакацыяй у мэтах эскаляцыі абстаноўкі. Ніякіх удараў па цэлях паблізу ўкраінска-польскай дзяржаўнай мяжы расейскімі сродкамі паражэньня не наносілася», — заявілі ў ведамстве.
Як падкрэсьлілі ў Міністэрстве абароны Расеі, апублікаваныя польскімі СМІ зь месца здарэньня фатаграфіі абломкаў ня маюць дачыненьня да расейскіх сродкаў паражэньня.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фатаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў.
- Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка даў інтэрвію расейскай прапагандыстцы Вользе Скабеевай, зь якога вынікала, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 1 жніўня Лукашэнка сказаў, што больш як палова тактычнай ядзернай зброі, якую заплянавана разьмясьціць на беларускай тэрыторыі, ужо «завезена і разгрупавана» па краіне. Ён ня раз заяўляў, што ўжыве ядзерную зброю ў выпадку агрэсіі супраць Беларусі.
- У чэрвені 2023 году ўкраінскія войскі пачалі контранаступальныя апэрацыі на ўсходзе і поўдні краіны. Расейскія войскі падрыхтавалі добра ўмацаваныя лініі абароны, таму прасоўваньне контранаступу ішло са значнымі стратамі.
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы правялі некалькі масавых абстрэлаў украінскіх гарадоў, у Дніпры, Кіеве, Харкаве і іншых месцах дзясяткі людзей загінулі і атрымалі раненьні. Украінскі бок у адказ абстраляў расейскі Белгарад, некалькі чалавек загінулі.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
