Расейскія войскі працягваюць наносіць удары па Ўкраіне. За ўчора Расея нанесла 10 ракетных і 18 авіяцыйных удараў больш як па 10 населеных пунктах, сярод якіх Кіеў, Жытомір, Харкаў, Дніпро, Крывы Рог, Запарожжа, Курахавае Данецкай вобласьці, Трыхаты Мікалаеўскай вобласьці і Мікалаеў.
Ракеты цэляць у жылыя масівы, вузлы сувязі і энэргетычныя аб’екты. Украінскія ўлады вымушаны заклікаць грамадзян эканоміць электраэнэргію і ваду.
Ратавальныя службы разьбіраюць завалы, разгортваюць пры неабходнасьці палявыя кухні, а энэргетыкі адразу пасьля скасаваньня трывог пачынаюць аднаўляць аб’екты.
Беларускі палітвязень: «Горка і балюча ад таго, што адбываецца ва Ўкраіне»
Тэлеграм-канал @dissidentby паведаміў, што ў выніку расейскіх абстрэлаў загінула пляменьніца беларускага палітвязьня Аляксандра Патапава. Ён украінец, але мае беларускае грамадзянства. Да 45 гадоў ён жыў ва Ўкраіне, а апошнія гады — у вёсцы Хатоля Віцебскай вобласьці. 68-гадовага мужчыну затрымалі ў межах крымінальнай справы, якую завялі паводле артыкула 368 Крымінальнага кодэксу Беларусі, за нібыта абразу Лукашэнкі ў камэнтарах у адной з сацыяльных сетак.
Ягоную справу ўжо перадалі на разгляд у суд.
«Мне горка і балюча за тое, што адбываецца ва Ўкраіне, дзе гінуць ні ў чым не вінаватыя людзі і дзеці. У часе ракетнага абстрэлу Кіева загінула мая пляменьніца, а яе трохгадовая дочачка стала калекай», — напісаў Аляксандар Патапаў у адным са сваіх лістоў на волю.
У той жа час пакуль дакладна не вядома, калі гэта адбылося. Кіеў з 10 жніўня зноў апынуўся пад прыцэлам расейскай арміі.
Безь сьвятла і вады застаўся горад-спадарожнік Запароскай АЭС
У ноч на 19 кастрычніка расейцы абстралялі горад Энэргадар, пабудаваны для спэцыялістаў, якія абслугоўваюць найбольшую ў Эўропе і цяпер захопленую расейцамі Запароскую АЭС.
«Абстрэлы спачатку прамысловай зоны, а потым і самога гораду пачаліся апоўначы і не сьціхаюць раніцай. Ёсьць паведамленьне аб пашкоджаньні адной з падстанцый, а таксама будынку выканаўчага камітэту гарадзкой рады. Інфармацыю аб пацярпелых сярод цывільнага насельніцтва пакуль не атрымалі. Прашу ўсіх да стабілізацыі сытуацыі заставацца дома і выконваць правілы дзьвюх сьцен», — напісаў мэр Энэргадару Дзьмітро Арлоў у сваім тэлеграм-канале.
Расея працягвае тэрарызаваць Нікапальскі і Крывароскі раёны на Днепрапятроўшчыне
Кіраўнік вайсковай адміністрацыі гораду Крывы Рог Аляксандар Вілкул паведаміў, што ў выніку расейскіх удараў без электраэнэргіі засталося шмат населеных пунктаў у Крывароскім раёне, а таксама некалькі грамад у раённым цэнтры. Некаторыя зь іх — яшчэ і без вады.
«Энэргетыкі і ўсе неабходныя службы з ночы працуюць над ліквідацыяй наступстваў варожага ўдару», — паведаміў Аляксандар Вілкул у сваім тэлеграм-канале.
Паводле яго, расейцы працягваюць тэрарызаваць Нікапальскі раён. З «Градаў» і «Ўраганаў» абстралялі Марганец і Чырвонагрыгораўку. Пашкоджаны жылыя дамы, без ахвяр.
Украінскія войскі адбілі некалькі атак у Харкаўскай і Данецкай абласьцях
Генэральны штаб Узброеных сіл Украіны паведаміў, што ўкраінскія войскі адбілі атакі расейцаў у раёнах населеных пунктаў Агурцова і Двурэчнае ў Харкаўскай вобласьці, каля Белагораўкі на Луганшчыне, а таксама каля Мар’інкі, Нью-Ёрку і Вопытнага ў Данецкай вобласьці.
Ракетныя войскі і артылерыя Ўкраіны нанесла ўдары па чатырох пунктах кіраваньня і пяці раёнах канцэнтрацыі расейскай жывой сілы і вайсковай тэхнікі.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе на просьбу груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах вобласьцяў. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, некаторыя яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам. Насуперак заявам Пуціна пра атакі выключна на вайсковыя аб’екты, расейцы пачалі бамбіць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фатаздымкаў, на якіх відаць сотні нябожчыкаў, ахвяраў масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага 2022 году Расея захапіла толькі адзін абласны цэнтар — Херсон. Горад быў акупаваны расейскімі войскамі ў першыя дні вайны фактычна без баёў. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый і ў Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якіх Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 17 лістапада 2024 году тагачасны прэзыдэнт ЗША Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- З прыходам да ўлады ў ЗША прэзыдэнта Дональда Трампа рэзка актывізавалася тэма магчымых мірных перамоваў. Улетку 2025 году Дональд Трамп правёў шэраг сустрэчаў, у тым ліку з Уладзімірам Зяленскім і Ўладзімірам Пуціным. Аднак дамовіцца пра мірнае пагадненьне ці прынамсі пра асабістую сустрэчу прэзыдэнтаў Украіны і Расеі не атрымалася. Агулам мірныя перамовы дагэтуль не далі істотных вынікаў.
- 1 чэрвеня 2025 году на Дзень расейскай авіяцыі Ўкраіна правяла маштабную апэрацыю «Павуціньне». Служба бясьпекі Ўкраіны зладзіла ўдары па авіябазах па ўсёй тэрыторыі Расеі, зьнішчыўшы дзясяткі расейскіх вайсковых самалётаў. Дакладна невядома, адкуль кіраваліся гэтыя дроны і ці выкарыстоўвалі яны штучны інтэлект для нацэльваньня на расейскія самалёты. Паводле ўкраінскага боку, дахі грузавікоў, дзе хаваліся дроны, адчынялі дыстанцыйна, каб дазволіць квадракоптэрам узьлятаць.
- З пачатку 2024 году па цяперашні час украінскія дроны пашкодзілі мноства расейскіх нафаперапрацоўчых заводаў, што прывяло да істотнага скарачэньня вытворчасьці нафтапрадуктаў у Расеі.
- Лінія фронту ва Украіне на працягу 2025 і на пачатку 2026 году заставалася адносна стабільнай. Пры гэтым расейскія войскі павольна прасоўваліся на асобных участках. З кастрычніка 2025 па сакавік 2026 году Расея захапіла каля 1833 км². На пачатку 2026 году ўкраінскія сілы правялі шэраг удалых контратак. У канцы красавіка 2026 году ўпершыню за доўгі час Ўкраіна адваявала больш тэрыторыі, чым страціла.
Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.