За мінулыя суткі ўдары расейскіх войскаў атрымалі больш за 20 населеных пунктаў, паведамілі ў Генштабе Узброеных сіл Украіны.
Паводле зьвестак штаба, праціўнік нанёс два ракетныя і 26 авіяўдараў, нанёс больш за 80 удараў з рэактыўных сістэм залпавага агню.
«Пад удары праціўніка патрапілі больш за дваццаць населеных пунктаў:: Белапольле ў Сумскай вобласьці, Славянск, Паўлаўка і Навасёлка ў Данецкай вобласьці, Марганец у Днепрапятроўскай вобласьці, Праўдзіна і Білагірка ў Херсонскай вобласьці. Войскі РФ атакавалі Мікалаеў з пятнаццаці бесьпілотнікаў-камікадзэ, адзінаццаць з якіх былі зьбітыя», — гаворыцца ў паведамленьні.
Атака дронамі-камікадзэ на цэнтар Кіева. ФОТА
Раніцай у панядзелак, 17 кастрычніка, сталіцу Ўкраіны Кіеў атакавалі з бесьпілётнікаў-камікадзэ. У Кіеве прагрымела некалькі выбухаў, пазьней над адным з будынкаў у цэнтры гораду падняўся дым, пішуць украінскія СМІ. У нежылым доме на месцы прылёту пачаўся пажар.
Сьпікер Паветраных сіл Украіны Юры Ігнат на брыфінгу 17 кастрычніка паведаміў, што ўсё дроны Расея запусьціла з паўднёвага кірунку. Паводле яго, з 21.30 16 кастрычніка да 11-й 17 кастрычніка ўкраінскія вайскоўцы зьбілі 37 дронаў іранскай вытворчасьці.
Пазьней у эфіры тэлеканалу Юры Ігнат удакладніў, што раніцай 17 кастрычніка з тых дронаў, што заляцелі на тэрыторыю Ўкраіны, ніводны зь іх ня быў запушчаны з тэрыторыі Беларусі.
«На мінулым тыдні зь Беларусі запускаліся 13 дронаў, і яны былі зьбітыя», — сказаў Юры Ігнат.
«Працуюць пажарныя падразьдзяленьні. Пашкоджана некалькі жылых дамоў. На месцы знаходзяцца мэдыкі. Інфармацыя аб пацярпелых удакладняецца», — дадаў мэр Кіева Віталь Клічко. Знайшлі цела аднаго загіблага, трох пацярпелых шпіталізавалі, выратавальная апэрацыя працягваецца.
Кіраўнік украінскага ўраду Дзяніс Шмыгаль паведаміў, што раніцай 17 кастрычніка Расея атакавала энэргетычную інфраструктуру ў трох абласьцях Украіны.
«У прыватнасьці, зафіксавана пяць удараў дронамі ў Кіеве. Пашкоджаны энэргетычныя аб’екты і жылы будынак. Агрэсар таксама нанёс удар па крытычнай інфраструктуры на Днепрапятроўшчыне і Сумшчыне. Сотні населеных пунктаў абясточаныя ў выніку атакі», — паведаміў Дзяніс Шмыгаль у сваім тэлеграм-канале.
У Кіеве працуюць сыстэмы СПА.
Кіраўнік Сумскай абласной вайсковай адміністрацыі Дзьмітро Жывіцкі паведаміў, што пасьля расейскага абстрэлу ягонага рэгіёну ёсьць пацярпелыя.
«Роменскі раён. Ракетны ўдар па аб’ектах крытычнай інфраструктуры пасьля 5-й раніцы. Ёсьць пацярпелыя», — напісаў ён у Telegram.
Таксама ноччу расейскія войскі атакавалі аб’ект энэргетычнай інфраструктуры ў Днепрапятроўскай вобласьці — там узьнік моцны пажар.
Украінскія вайскоўцы раніцай зьбілі тры расейскія крылатыя ракеты над Днепрапятроўскай вобласьцю, паведаміў кіраўнік абласной вайсковай адміністрацыі рэгіёну Валянцін Рэзьнічэнка.
«Да сьвітаньня вайскоўцы камандаваньня авіяцыі „Ўсход“ зьнішчылі тры расейскія крылатыя ракеты над рэгіёнам. Дзьве — над Крывароскім раёнам, адну — над Нікапальскім», — напісаў ён у тэлеграме.
Але, па словах Рэзьнічэнкі, адна расейская ракета пацэліла ў аб’ект энэргетычнай інфраструктуры — там моцны пажар.
Нікапальскі раён на ўсходзе краіны абстралялі з «Градаў» ды цяжкай артылерыі, туды прыляцела ажно 30 снарадаў.
Апошнім часам, акрамя ракетных удараў, Расея пачала актыўна выкарыстоўваць для нападаў бесьпілётнікі-камікадзэ іранскай вытворчасьці. Зь іх дапамогай акупанты наносяць удары па аб’ектах украінскай інфраструктуры.
Паводле ўкраінскай выведкі, Расея замовіла ў Іране 2400 бесьпілётнікаў-камікадзэ «Шагед». Напярэдадні, 16 кастрычніка, іранскія дроны-камікадзэ тыпу «Шагед-136» атакавалі Мікалаеў на поўдні Ўкраіны. Яны трапілі ў аб’екты прамысловай інфраструктуры і фармацэўтычны склад.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе на просьбу груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах вобласьцяў. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, некаторыя яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам. Насуперак заявам Пуціна пра атакі выключна на вайсковыя аб’екты, расейцы пачалі бамбіць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фатаздымкаў, на якіх відаць сотні нябожчыкаў, ахвяраў масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага 2022 году Расея захапіла толькі адзін абласны цэнтар — Херсон. Горад быў акупаваны расейскімі войскамі ў першыя дні вайны фактычна без баёў. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый і ў Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якіх Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 17 лістапада 2024 году тагачасны прэзыдэнт ЗША Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- З прыходам да ўлады ў ЗША прэзыдэнта Дональда Трампа рэзка актывізавалася тэма магчымых мірных перамоваў. Улетку 2025 году Дональд Трамп правёў шэраг сустрэчаў, у тым ліку з Уладзімірам Зяленскім і Ўладзімірам Пуціным. Аднак дамовіцца пра мірнае пагадненьне ці прынамсі пра асабістую сустрэчу прэзыдэнтаў Украіны і Расеі не атрымалася. Агулам мірныя перамовы дагэтуль не далі істотных вынікаў.
- 1 чэрвеня 2025 году на Дзень расейскай авіяцыі Ўкраіна правяла маштабную апэрацыю «Павуціньне». Служба бясьпекі Ўкраіны зладзіла ўдары па авіябазах па ўсёй тэрыторыі Расеі, зьнішчыўшы дзясяткі расейскіх вайсковых самалётаў. Дакладна невядома, адкуль кіраваліся гэтыя дроны і ці выкарыстоўвалі яны штучны інтэлект для нацэльваньня на расейскія самалёты. Паводле ўкраінскага боку, дахі грузавікоў, дзе хаваліся дроны, адчынялі дыстанцыйна, каб дазволіць квадракоптэрам узьлятаць.
- З пачатку 2024 году па цяперашні час украінскія дроны пашкодзілі мноства расейскіх нафаперапрацоўчых заводаў, што прывяло да істотнага скарачэньня вытворчасьці нафтапрадуктаў у Расеі.
- Лінія фронту ва Украіне на працягу 2025 і на пачатку 2026 году заставалася адносна стабільнай. Пры гэтым расейскія войскі павольна прасоўваліся на асобных участках. З кастрычніка 2025 па сакавік 2026 году Расея захапіла каля 1833 км². На пачатку 2026 году ўкраінскія сілы правялі шэраг удалых контратак. У канцы красавіка 2026 году ўпершыню за доўгі час Ўкраіна адваявала больш тэрыторыі, чым страціла.
Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.